Rossiyada baxtsiz hodisa oqibatida vafot etgan o‘zbekistonlik mehnat migrantining oilasiga 1 million rubldan ortiq mablag‘ undirib berildi. Bu haqda Tashqi mehnat migratsiyasi agentligi matbuot xizmati xabar berdi.
Ma’lum qilinishicha, fuqaro B.Yu.(1994-yilda tug‘ilgan) Rossiyaning “Monotek Stroy” MChJda ish boshlaganidan 2 oy-u 5 kun o‘tib, 2020-yilning 21-sentabrida ishlab chiqarishdagi baxtsiz hodisa oqibatida vafot etgan. Uning Xorazm viloyatida ota-onasi bilan birga yashovchi turmush o‘rtog‘i (1995-yilda tug‘ilgan) va qizi (2019-yilda tug‘ilgan) qolgan.
Marhumning oilasiga zararni undirib berish bo‘yicha O‘zbekiston Vazirlar Mahkamasi, Bandlik va mehnat munosabatlari vazirligi, Tashqi mehnat migratsiyasi agentligi tomonidan rossiyalik yuristlar jamoasi jalb etilib, uzoq davom etgan jarayonlardan so‘ng 1 million 161 ming rubl (15 774 dollar) mablag‘ to‘lab berish bo‘yicha ish beruvchi bilan yuridik kelishuvga erishilgan.
Shuningdek, Rossiya qonunchiligiga muvofiq, marhumning oilasiga jabrlanuvchining ish joyida baxtsiz hodisa oqibatida vafot etgani munosabati bilan 1 million rubl atrofida kompensatsiya berilishi ham ko‘zda tutilgan.
Qayd etilishicha, hozirda Rossiya Ijtimoiy sug‘urta jamg‘armasidan ushbu mablag‘ni undirish va marhumning voyaga yetmagan qiziga 18 yoshga to‘lgunga qadar nafaqa tayinlash masalasi hal qilinmoqda.
Agentlik bergan ma’lumotga ko‘ra, 2021-yilning 10 oyi davomida xorijda vafot etgan 361 nafar fuqaro jasadi olib kelingan, 408 nafar xorijda qiyin ahvolda qolgan fuqarolar qaytarilgan, og‘ir tan jarohati olgan 12 nafar mehnat migrantining tibbiy xizmat xarajatlari qoplab berilgan.
Shuningdek, 5 ming 984 nafar mehnat migrantiga bir martalik moddiy yordam ajratilgan, 308 nafar mehnat migranti vaqtincha hostelga joylashtirilgan.
Bundan tashqari, xorijda mehnat faoliyatini amalga oshirayotgan 7 992 nafar mehnat migrantiga huquqiy yordam, 288 352 nafariga maslahat xizmatlari, 6 194 nafariga ijtimoiy yordam, 10 951 nafariga moddiy yordam ko‘rsatilgan.
Izoh (0)