UzAuto Motors kompaniyasi Chevrolet Captiva 5 avtomobillarini yetkazib berish bo‘yicha shartnomalar tuzishni to‘xtatishga majbur bo‘lganini ma’lum qildi.
“Yuzaga kelgan holat kompaniya tarixida birinchi bor yuz berishi, lekin biz bugungi kunda jahon avtomobil sanoati og‘ir kunlarni boshdan kechirayotgani va bizning kompaniyamiz ham bundan mustasno emasligini bir necha bor xabar qilganmiz”, — deyiladi bayonotda. Kompaniya rahbariyati va jamoasi “o‘z mijozlaridan keltirilgan noqulayliklar uchun cheksiz uzr so‘raydi”.
Mijozlar murojaatidan keyin 3 kun ichida tuzilgan shartnomalar bo‘yicha to‘langan barcha mablag‘lar to‘liq qaytariladi. Shuningdek, kompaniya qo‘shimcha ravishda oldindan to‘lov summasining 5 foizini kompensatsiya sifatida taqdim etadi.
Bundan tashqari, yangi krossover sotib olish ehtiyojida bo‘lgan xaridorlarimiz o‘z xohishiga ko‘ra, Chevrolet Captiva-5 avtomobili o‘rniga Chevrolet Equinox yoki Tracker modellarini xarid qilishlari mumkin. Almashtirilgan avtomobillarni yetkazib berish muddati Chevrolet Captiva 5 uchun tuzilgan shartnomalarga muvofiq, 2022-yil yanvar oyidan kechiktirilmagan holda amalga oshiriladi.
Shuningdek, xaridorlarga yuqorida ko‘rsatilgan muddat asosida Captiva 5 avtomobili o‘rniga Malibu, Cobalt yoki Trailblazer avtomobillarini xarid qilish imkoniyatini ko'rib chiqish taklif etiladi.
O‘zbekistonda yangi Captiva 5 krossoverining sotuvga chiqishi sentabr oyida e’lon qilingandi.
Ma’lumot uchun, Captiva modeli O‘zbekiston bozoriga 2007-yilda kirib kelgan. O‘sha yilning oktabrida mamlakatda avtomobilni yig‘ish yo‘lga qo‘yilgan. 2011-yilning sentabri va 2017-yilning fevralida model yangilangan. 2018-yilning sentabrida esa GM’ning global strategiyasiga muvofiy uni ishlab chiqarish to‘xtatilgan.
Izoh (0)