Toshkent—Dushanbe yo‘nalishi bo‘yicha uchgan reys ob-havo noqulayligi sabab Xo‘jand aerportiga yo‘naltirildi, deb xabar beradi Telegram’dagi “Novosti Tashkentskogo neba” kanali.
Ma’lum qilinishicha, 20-noyabrga o‘tar kechasidan boshlab Dushanbe xalqaro aeroporti noqulay ob-havo sharoiti sabab samolyotlar parvozi va uchishi uchun yopilgan. Shu sababli Somon Air aviakompaniyasining Toshkent—Dushanbe yo‘nalishi bo‘yicha uchgan SZ-226 reysi Xo‘janddagi zaxira aeroportiga yo‘naltirilgan.
Shuningdek, Fly Dubai aviakompaniyasining Dubay—Dushanbe yo‘nalishi bo‘yicha uchgan FZ-777 reysi Islom Karimov nomidagi Toshkent xalqaro aeroportiga yo‘natirilgan.
Bundan tashqari, Uzbekistan Airways’ning Toshkent—Dushanbe yo‘nalishi bo‘yicha 20-noyabr kuni parvoz qilishi kerak bo‘lgan HY-717 reysi ham kechiktirilgan. Bunga Dushanbe aeroportidagi kuchli tuman sabab bo‘lmoqda — qo‘nish zonasidagi gorizontal ko‘ruvchanlik 100 metrni, vertikal ko‘ruvchanlik esa 30 metrni tashkil etmoqda. Shu sababli Dushanbe—Toshkent qayta reysi ham kechiktiriladi.
Eslatib o‘tamiz, 17-noyabr kuni Uzbekistan Airways aviakompaniyasi ob-havo noqulayligi sabab bir qator xalqaro va mahalliy reyslar parvozini kechiktirgan edi. Keyinroq kechiktirilgan barcha reyslar o‘z yo‘nalishi bo‘yicha uchib ketgani ma’lum qilindi.
Izoh (0)