Қашқадарё вилоятининг собиқ ҳокими Зоир Мирзаев ўрнатишни тўхтатган Қарши шаҳридаги 1 миллиард 350 миллион сўмлик байроқ Қарши шаҳар ҳокими қарори билан қайта бунёд этилмоқда. Бу ҳақда «Дарё» мухбири хабар берди.
Қарши шаҳри ҳокими Нормўмин Холбоевнинг 2021 йилнинг 15 ноябрдаги «Қарши шаҳар маҳаллий бюджетининг 2021 йилнинг III-чорак якуни бўйича даромадлар режасининг ошириб бажарилган қисми ҳисобидаги маблағларни йўналтириш тўғрисида»ги қарорига кўра, мазкур байроқ қурилиши учун 300 миллион сўм маблағ ажратилган.
Мазкур масала юзасидан Қарши шаҳар ҳокимининг қурилиш масалалари бўйича ўринбосари Ғайрат Султонов байроқ ўрнатилиши давом эттирилаётганини, шу боис 300 миллион сўм ажратилганини билдирган.
Ғайрат Султонов «Дарё» мухбирининг «байроқ қурилишига дастлаб 1 миллиард 300 миллион сўм маблағ ажратилиб, шунга кўра лойиҳа қилинган бўлса 300 миллион сўм маблағ етадими?», дея берган саволига яна қўшимча маблағ ажратилишини, аммо аввалги 1 миллиард 350 миллион сўмлик қиймат ўзгариши мумкинлигини маълум қилган.
«Лойиҳа қайта қилинади ва 1 миллиард 350 миллион сўм қисқартиртирилиши мумкин», — дейди бу ҳақда гапирган ҳоким ўринбосари.
Ғайрат Султонов «лойиҳа қилингач, лойиҳага қараб маблағ ажратилмайдими?», дея берилган саволга «Йўқ, ҳозир бу маблағ биринчи лойиҳа бўйича ажратилган», дея жавоб берган.
Эслатиб ўтамиз, апрель ойида Қаршида 1 миллиард 350 миллион сўмлик байроқ қад ростлаётгани маълум бўлгач, Олий Мажлис депутати Дониёр Ғаниев бунга эътибор қаратиб, 2020 йил Фарғонада ҳам шундай ташаббус илгари сурилганини, бироқ вилоят ҳокими байроқ устун қурилиши учун 1 миллиард сўм маблағ кераклигини эшитгач, ташаббускорларни ҳайдаб юборганини маълум қилганди.
Қашқадарёлик блогер Умид Каримов эса вилоятнинг Деҳқонобод туманида қад ростлаган 40 метрлик байроқ 164 миллион 900 минг сўмга тушганини, кўриниши жиҳатидан шу байроқдан фарқ қилмайдиган 62,5 метрлик байроқ эса 1 миллиард 350 миллион сўмга баҳоланаётганидан ажабланишини ёзганди. Шундан сўнг вилоятнинг собиқ ҳокими Зоир Мирзаев Қаршида хароба аҳволдаги ётоқхона борлигини айтиб, байроқ учун сафрланиши кўзда тутилган 1 миллиард 350 миллион сўм маблағ ётоқхона таъмири учун сафрланишини маълум қилиб, ётоқхона таъмирини амалга оширганди.
Изоҳ (0)