O‘zbekiston respublika tovar-xomashyo birjasida benzin narxi tushishni boshladi, deya xabar bermoqda Monopoliyaga qarshi kurashish qo‘mitasi.
Ma’lum qilinishicha, Iqtisodiy taraqqiyot va kambag‘allikni qisqartirish vazirligi, Monopoliyaga qarshi kurashish qo‘mitasi, O‘zbekiston respublika tovar-xomashyo birjasi hamda tegishli vazirlik va idoralar mas’ul xodimlaridan iborat Ishchi guruhi tomonidan Ai-80 markali avtomobil benzinini birja savdolari orqali barcha xaridorlarga teng sharoitlarda sotilishini tashkil qilish maqsadida, quyidagi amaliy choralar ko‘rilgan:
- birinchidan, neftni qayta ishlash korxonalari tomonidan 2021-yil 17-noyabrdan boshlab birja savdolariga qo‘yiladigan kunlik umumiy avtomobil benzini hajmining kamida 20 foizini 1 tonnalik lotlarda qo‘yilishi ta’minlandi;
- ikkinchidan, birja savdolariga qo‘yilayotgan avtomobil benzini xaridorlariga keng imkoniyatlar yaratish maqsadida, bir savdo sessiyasida bir xaridor tomonidan xarid qilinadigan mahsulot hajmlarining maksimal miqdorini 60 tonnalik lotlar bo‘yicha 120 tonna hamda 1 tonnalik lotlar bo‘yicha 10 tonna miqdorida (limit) belgilandi;
- uchinchidan, birja savdolariga qo‘yilayotgan avtomobil benzinini kunlik qo‘yiladigan hajmlari oshirildi.
“Yuqoridagi ko‘rsatilgan chora-tadbirlar bu vaqt talab qiladigan masala va tabiiyki ushbu davrda avtomobillarga yonilg‘i quyish shoxobchalari tomonidan ilgari sotib olingan qimmat narxdagi benzin zaxiralari hisobiga yuqori chakana narxlar saqlanib qolishi mumkin”, —deyiladi qo‘mita xabarida.
Eslatib o‘tamiz, 2020-yil 1-maydan boshlab Ai-80 markali avtomobil benzini va dizel yoqilg‘isi (shu jumladan, EKO markali dizel yoqilg‘isi) chakana narxlarini davlat tomonidan tartibga solish bekor qilindi. Shundan so‘ng 3-maydan boshlab Ai-80 benzinining narxi 500 so‘mga pasayib, bir litri 4000 so‘mdan sotila boshladi. 2020-yilning dekabrida mazkur markadagi benzinining o‘rtacha boshlang‘ich narxi 2,6 foizga ko‘tarilgandi. 2021-yilning yanvar oxirlarida Ai-80 benzini narxi 110 so‘mga qimmatlashgan, 2021-yilning fevralida ushbu benzin narxi qariyb 5 foizga oshgandi. Mart oyida 1,4 foizga pastlagan bo‘lsa, aprel oyida 0,2 foizga, may oyida 3 foizga yana oshgan. Toshkentda iyun oxirlarida eng xaridorgir Ai-80 markadagi benzin narxi 6000 so‘mga ko‘tarilgani ijtimoiy tarmoqlar foydalanuvchilari o‘rtasida qizg‘in muhokamalarga sabab bo‘lgandi.
Izoh (0)