Toshkent viloyati Olmaliq shahrida “Toshkent suv ta’minoti” Olmaliq shahar filiali boshlig‘i tadbirkordan pora olayotgan vaqtda qo‘lga tushdi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Qayd etilishicha, departamentning Toshkent viloyat boshqarmasi tomonidan tadbirkorlik subyektlarining huquqlarini himoya qilish yuzasidan viloyat IIB xodimlari bilan hamkorlikda tezkor tadbir o‘tkazilgan.
Unda “Toshkent suv ta’minoti” Olmaliq shahar filiali boshlig‘i I.Sh. filialning yetakchi muhandisi F.K. bilan oldindan til biriktirib, “F.L.” MChJ ta’sischisi E.dan savdo majmuasini qurishda sarflanayotgan suv uchun rasmiylashtirilgan bayonnomani bazaga kiritmaslik evaziga 2000 AQSh dollari pora talab qilib, shundan 1000 AQSh dollarini F.K. olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 210-moddasi (pora olish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Jizzaxda tuman prokurori o‘rinbosari 8 ming dollar pora bilan, Andijon prokuraturasi xodimi 15 ming dollar pora bilan hamda Qoraqalpog‘istonda IIV xodimi pora olayotganida qo‘lga tushgani haqida xabar berilgandi.
Izoh (0)