Kobulda tinch aholining o‘limiga sabab bo‘lgan AQSh dronining hujumida hech qanday qonunbuzarlik aniqlanmadi — Pentagon

Avgust oyida Kobulda 10 nafar tinch aholining o‘limiga sabab bo‘lgan AQSh dronining hujumi jinoiy beparvolik tufayli emas, balki qator xatolar tufayli sodir bo‘lgan. Bu haqda AQSh Harbiy havo kuchlari bosh inspektori Samid Saidga tayanib, Reuters xabar berdi.

Agentlik ma’lumotlariga ko‘ra, Harbiy havo kuchlari bosh inspektori tomonidan olib borilgan tekshiruv shuni ko‘rsatdiki, zarba yo‘llashdagi xatolar, ma’lum nuqtayi nazarlarni qo‘llab-quvvatlovchi ma’lumotlar talqini va aloqa uzilishlari bilan bog‘liq.

“Bu achinarli xatolik bo‘lgan. Men javobgarlik ehtimolini istisno qilmadim, ammo bu savol qo‘mondon uchun. Bizning darajamizda men qonunlar va urush qoidalarining buzilishini topmadim”, — dedi Said.

Inspektorning so‘zlariga ko‘ra, u ma’lumotlar va videoyozuvlarni o‘rganish davomida dron zarbasi tushishidan, taxminan, ikki daqiqa oldin yaqin atrofda bir bola borligi haqida dalil topdi. Biroq u bolaning borligini voqeadan so‘ng videoni ko‘rayotganda payqaganini, hodisa vaqtida uni ilg‘ash mushkul ekanini qo‘shimcha qildi.

Agentlikning ta’kidlashicha, idora “zarbadagi noaniqliklar”, shuningdek, “xabar berishda tinch aholining o‘limiga olib kelgan xatoliklar va aloqa uzilishi”ni tan oldi.

Hodisa qurbonlardan biri ishlagan Nutrition and Education International tashkilotining asoschisi va prezidenti Stiven Kvonning aytishicha, tergov “juda hafsalani pir qiladigan va qoniqarsiz” olib borilgan.

“Bosh inspektorning aytishicha, xatoga yo‘l qo‘yilgan, ammo hech kim noto‘g‘ri ish qilmagan,  men esa qanday qilib bunday bo‘lishi mumkinligidan faqat hayratdaman”, — dedi Kvon.

29-avgust kuni AQSh harbiylari Kobulda go‘yoki “Viloyati Xuroson” — IShIDning Afg‘onistondagi bo‘linmasi terrorchilariga tegishli mashinani portlatgani haqida e’lon qilgandi. Harbiylar MQ-9 Reaper uchuvchisiz uchar qurilmasi bilan portlatilgan mashina haydovchisining shaxsini aniqlay olmaganini aytgan. Ularning ma’lumotlariga ko‘ra, portlash paytida haydovchidan tashqari mashina yonidagi uch bola ham halok bo‘lgan.

Keyinroq The New York Times va The Washington Post jurnalistlari ular qurbonning shaxsini aniqlaganini da’vo qildi. Ma’lum bo‘lishicha, marhum 43 yoshli elektrotexnika muhandisi Zamaray Ahmadiy bo‘lib, u 2006-yildan beri Afg‘onistondagi ochlarga yordam berib kelayotgan Kaliforniyaning Nutrition and Education International (NEI) xayriya tashkilotida ishlagan.

Ahmadiyning mashinasiga qilingan hujumni asoslash uchun dalillardan biri shuki, u ishxonasida yana uch kishi bilan birga mashinasiga tarkibi tushunarsiz yuklarni ortgan va bu Amerika droni tomonidan yozib olingan. Biroq Ahmadiyning hamkasblari bu portlovchi moddalar emas, balki suv bilan to‘ldirilgan uchta plastik bak ekanini ta’kidlamoqda: u ishxonadan uyiga suv olib ketayotgan edi.

Shundan so‘ng Amerika qo‘mondonligi vakillari jurnalistlarga hodisa yuzasidan ichki tergov boshlanganini aytdi.