Seul KXDR yetakchisi Kim Chen Inning Koreya urushi tugagani haqidagi deklaratsiyani tilga olishiga katta ahamiyat bermoqda. Bu haqda Janubiy Koreya prezidenti ma’muriyatidagi yuqori martabali amaldorga tayanib, “RIA Novosti” xabar berdi.
Janubiy Koreya prezidenti Mun Chje Inning o‘zi Vengriya poytaxti Budapeshtga tashrifi chog‘ida jurnalistlarga Kim Chen Inning urush tugagani to‘g‘risidagi deklaratsiyani tilga olishi “birinchi marta” bo‘lganini aytdi.
“Shimoliy Koreya rahbariyati urush tugagani e’lon qilinishiga xalqaro miqyosda qiziqish bildirgani ko‘p narsani anglatadi”, — dedi Janubiy Koreya prezidenti ma’muriyatining yuqori martabali rasmiysi shu munosabat bilan.
Kim Chen In XIV Oliy Xalq Assambleyasining (OXQ) 5-sessiyasidagi nutqida shunday degan edi: “Janubiy Koreya o‘z siyosatida noxolis va adolatsiz ikki tomonlama standartlarga amal qilishda davom etar ekan va so‘zlarni amallar bilan tasdiqlamas ekan, urush tugagani e’lon qilingan taqdirda ham jangovar harakatlar davom etadi”.
Koreyalararo urush (1950—1953) tinchlik shartnomasi bilan emas, balki o‘t ochishni to‘xtatish haqidagi sulh imzolanishi bilan yakunlanganidan beri Koreya yarimoroli hali ham rasmiy ravishda urush holatida. Sulhni bir tomondan KXDR va Xitoy qo‘shinlari qo‘mondonlari, ikkinchi tomondan esa BMT bayrog‘i ostidagi AQSh imzolagan. KXDRning tinchlik shartnomasini imzolashga bo‘lgan keyingi barcha urinishlari AQSh tomonidan rad etildi.
AQSh prezidenti Donald Tramp davrida misli ko‘rilmagan AQSh—Shimoliy Koreya sammiti muzokaralari boshlandi, uning boshida urushni rasman tugatish bo‘yicha kelishuvga erishildi. Biroq, amalda hech qanday sezilarli natijalar kuzatilmadi.
Izoh (0)