Turkiyada mamlakat prezidenti Rajab Toyyib Erdo‘g‘on haqida Twitter’da “yolg‘on axborot beruvchi postlar” tarqalgani sababli 30 kishiga nisbatan jinoiy ish ochildi. Bu haqda Turkiya Xavfsizlik bosh boshqarmasi bayonotiga tayanib, “RIA Novosti” xabar berdi.
Mahalliy OAV xabarlarida aniqlik kiritilishicha, Twitter’da Turkiyaning amaldagi prezidenti tilga olinishi bilan bog‘liq holda #death (o‘lim) xeshtegi ishga tushirilgan.
“Xeshteg ostida prezidentimizning sha’ni va qadr-qimmatini kamsituvchi noto‘g‘ri ma’lumotlar va har xil materiallar tarqatgan 30 nafar shaxs aniqlandi. Ularga nisbatan jinoyat ishi qo‘zg‘atilib, tergov harakatlari olib borilmoqda”, — deyiladi xabarda.
Shuningdek, yolg‘on axborotlarni o‘z ichiga olgan xabarlar bo‘yicha zarur tekshiruvlar o‘tkazilayotgani, natijalari adliya organlariga yuborilayotgani ma’lum qilingan.
Eslatib o‘tamiz, Turkiyada sentabr boshida Erdo‘g‘onning “Dunyo adolatliroq bo‘lishi mumkin” nomli yangi kitobi sotuvga chiqarilgandi. Kitobda Erdo‘g‘on global siyosat muammolariga, xususan, adolatsizlik, migratsion inqiroz, xalqaro terrorizm va islomofobiya, diskriminatsiya va ikki tomonlama standartlarga e’tibor qaratadi. Erdo‘g‘onning so‘zlariga ko‘ra, “Turkiyaning maqsadi — hokimiyatda bo‘lganlarning haq bo‘lishi emas, aksincha, haq bo‘lganlarning hokimiyatda bo‘lishini ta’minlovchi tizimni o‘rnatish”.
Mavzuga doir:
- Turkiya prezidenti AQSh va Germaniya singari 10 ta yetakchi mamlakatlar elchilarini persona non grata deb e’lon qilishni buyurdi. Ular turkiyalik huquq himoyachisining hibsdan ozod etilishini talab qilgandi
- Erdo‘g‘on AQShni Afg‘oniston kabi Suriya va Iroqdan ham o‘z qo‘shinlarini olib chiqishga chaqirdi
- Erdo‘g‘on BMTda Qrimning Rossiyaga qo‘shib olinishini tan olmasligini bildirdi
Izoh (0)