Fransiya prezidenti Emmanuel Makron Germaniya kansleri vazifasini bajaruvchi Angela Merkelni Faxriy legion ordeni bilan taqdirladi. Fransiyaning ushbu eng oliy mukofotini topshirish marosimi fransuz vinochilik mintaqasi hisoblanadigan Burgundiyada bo‘lib o‘tdi.
“Menga juda ko‘p narsani o‘rgatganingiz uchun sizga rahmat aytmoqchiman. Qadrli Angela, bizning Yevropamiz uchun qilgan barcha mehnatingiz uchun tashakkur”, — dedi Makron Angela Merkelga Faxriy legion ordenining topshirilishi munosabati bilan so‘zlagan nutqida.
Fransiya prezidenti Angela Merkel kansler sifatida faoliyat yuritish mobaynida “barcha to‘ntarishlarga qaramay” Yevropa birligini saqlashga hissa qo‘shganini ta’kidladi.
Faxriy legion ordeni Fransiyada 1802-yilda Napoleon Bonapart tomonidan ta’sis etilgan. U harbiylar hamda fuqarolarga tinchlik va urush davrida mamlakat oldidagi beqiyos xizmatlari uchun beriladi, shuningdek, u bilan boshqa davlatlar fuqarolari ham taqdirlanishi mumkin.
26-sentabr kuni Germaniya Federativ Respublikasi Bundestagiga saylovlar bo‘lib o‘tdi. Ularning yakunlariga ko‘ra, 16 yildan buyon ilk bor yangi hukumat Angela Merkelsiz tuziladi. Ayni damda tomonlar koalitsiya tuzish imkoniyatlarini muhokama qilmoqda.
Izoh (0)