Кобулда тинч аҳолининг ўлимига сабаб бўлган АҚШ дронининг ҳужумида ҳеч қандай қонунбузарлик аниқланмади — Пентагон

Август ойида Кобулда 10 нафар тинч аҳолининг ўлимига сабаб бўлган АҚШ дронининг ҳужуми жиноий бепарволик туфайли эмас, балки қатор хатолар туфайли содир бўлган. Бу ҳақда АҚШ Ҳарбий ҳаво кучлари бош инспектори Самид Саидга таяниб, Reuters хабар берди.

Агентлик маълумотларига кўра, Ҳарбий ҳаво кучлари бош инспектори томонидан олиб борилган текширув шуни кўрсатдики, зарба йўллашдаги хатолар, маълум нуқтаи назарларни қўллаб-қувватловчи маълумотлар талқини ва алоқа узилишлари билан боғлиқ.

«Бу ачинарли хатолик бўлган. Мен жавобгарлик эҳтимолини истисно қилмадим, аммо бу савол қўмондон учун. Бизнинг даражамизда мен қонунлар ва уруш қоидаларининг бузилишини топмадим», — деди Саид.

Инспекторнинг сўзларига кўра, у маълумотлар ва видеоёзувларни ўрганиш давомида дрон зарбаси тушишидан, тахминан, икки дақиқа олдин яқин атрофда бир бола борлиги ҳақида далил топди. Бироқ у боланинг борлигини воқеадан сўнг видеони кўраётганда пайқаганини, ҳодиса вақтида уни илғаш мушкул эканини қўшимча қилди.

Агентликнинг таъкидлашича, идора «зарбадаги ноаниқликлар», шунингдек, «хабар беришда тинч аҳолининг ўлимига олиб келган хатоликлар ва алоқа узилиши»ни тан олди.

Ҳодиса қурбонлардан бири ишлаган Nutrition and Education International ташкилотининг асосчиси ва президенти Стивен Квоннинг айтишича, тергов «жуда ҳафсалани пир қиладиган ва қониқарсиз» олиб борилган.

«Бош инспекторнинг айтишича, хатога йўл қўйилган, аммо ҳеч ким нотўғри иш қилмаган,  мен эса қандай қилиб бундай бўлиши мумкинлигидан фақат ҳайратдаман», — деди Квон.

29 август куни АҚШ ҳарбийлари Кобулда гўёки «Вилояти Хуросон» — ИШИДнинг Афғонистондаги бўлинмаси террорчиларига тегишли машинани портлатгани ҳақида эълон қилганди. Ҳарбийлар МQ-9 Reaper учувчисиз учар қурилмаси билан портлатилган машина ҳайдовчисининг шахсини аниқлай олмаганини айтган. Уларнинг маълумотларига кўра, портлаш пайтида ҳайдовчидан ташқари машина ёнидаги уч бола ҳам ҳалок бўлган.

Кейинроқ The New York Times ва The Washington Post журналистлари улар қурбоннинг шахсини аниқлаганини даъво қилди. Маълум бўлишича, марҳум 43 ёшли электротехника муҳандиси Замарай Аҳмадий бўлиб, у 2006 йилдан бери Афғонистондаги очларга ёрдам бериб келаётган Калифорниянинг Nutrition and Education International (NEI) хайрия ташкилотида ишлаган.

Аҳмадийнинг машинасига қилинган ҳужумни асослаш учун далиллардан бири шуки, у ишхонасида яна уч киши билан бирга машинасига таркиби тушунарсиз юкларни ортган ва бу Америка дрони томонидан ёзиб олинган. Бироқ Аҳмадийнинг ҳамкасблари бу портловчи моддалар эмас, балки сув билан тўлдирилган учта пластик бак эканини таъкидламоқда: у ишхонадан уйига сув олиб кетаётган эди.

Шундан сўнг Америка қўмондонлиги вакиллари журналистларга ҳодиса юзасидан ички тергов бошланганини айтди.