Yaponiya bosh vaziri bir vaqtning o‘zida ikkita lavozimda ishlashga qaror qildi

Yaponiya bosh vaziri Fumio Kisida o‘z partiyasi tomonidan e’lon qilingan yo‘nalishni darhol amalga oshirishga kirishishini, shuningdek, hukumatning navbatdagi tarkibi tasdiqlangunga qadar mamlakat Tashqi ishlar vazirligini shaxsan boshqarib turishini ma’lum qildi, deb xabar beradi “RIA Novosti”.

Eslatib o‘tamiz, 4-oktabr kuni Yaponiya parlamentining quyi palatasi ko‘pchilik ovoz bilan mamlakat hukmron Liberal-demokratik partiyasi (LDP) rahbari Fumio Kisidani Yaponiyaning 100-bosh vaziri etib sayladi.

“Umumiy saylovlarda jamoatchilik tomonidan qo‘llab-quvvatlandik. E’lon qilingan siyosiy yo‘nalishni kechiktirmasdan amalga oshirishga kirishmoqchiman”, — deydi Kisida.

Bosh vazir, shuningdek, TIV rahbari vazifasini bajarayotgan Tosimitsu Motegi hukmron Liberal-demokratik partiyasi (LDP) bosh kotibi lavozimiga tayinlanishi mavzusiga to‘xtalib o‘tgan.

“TIV rahbari Motegi partiyaning bosh kotibi lavozimiga tasdiqlangani munosabati bilan bugungi yig‘ilishda o‘z lavozimini tark etadi. Agarda bu amalga oshsa, men ikkita pozitsiyani birlashtirish niyatidaman va Vazirlar Mahkamasining keyingi tarkibi tasdiqlangunga qadar TIV rahbari vazifalarini bajarib turmoqchiman”, — deydi Kisida.

Parlamentning muhim sessiyasi 10-oktabr kuni chaqirilishi kutilmoqda. Yangi parlament mamlakat bosh vazirini saylashi kerak, bu shunchaki rasmiyatchilik hisoblanadi, chunki Kisida partiyasida deputatlarning yarmidan ko‘p ovozi bor.

Shuningdek, bosh vazir Kisida o‘zining ikkinchi hukumatini shakllantiradi. Hozircha uning tarkibi almashishi yoki yangilanishi noma’lum.

Avvalroq Yaponiya bosh vaziri Yosixide Suga boshchiligidagi hukumat to‘liq tarkibda iste’foga chiqqan edi. Suga koronavirusga qarshi kurashga e’tibor qaratish maqsadida muddati tugagach, Yaponiya bosh vaziri lavozimiga qayta nomzodini ko‘rsatmaslikka qaror qilgan. Avgust oyi boshida bosh vazir faoliyatini ma’qullash bo‘yicha reyting eng past ko‘rsatkichga (28 foiz) tushib ketgandi. Bu, xususan, mamlakatda bo‘lib o‘tgan Olimpiya o‘yinlari fonida koronavirus delta shtammining tez tarqalishi tufayli ro‘y bergan.