IShID Afg‘onistonda o‘z salohiyatini tiklab, 6-12 oydan so‘ng AQShga tahdid sola boshlashi mumkin. Bu haqda Pentagon rahbarining siyosiy masalalar bo‘yicha o‘rinbosari Kolin Kol Senatdagi tinglov chog‘ida ma’lum qildi, deb yozadi “Afghanistan.ru”
Kolning ta’kidlashicha, “Tolibon” IShIDga qarshi tura oladimi yoki yo‘qmi, haligacha noaniq bo‘lib qolmoqda. Unga ko‘ra, “Al-Qoida” tomonidan ham bir-ikki yil ichida AQShga qarshi hujumlar uyushtirish tahdidi mavjud.
Kolning so‘zlariga ko‘ra, Afg‘onistondagi “Al-Qoida”ning kuchayishi katta muammoga aylanishi mumkin, chunki bu guruh “Tolibon” bilan aloqaga ega.
“Ayni paytda razvedka hamjamiyatining fikricha, ‘Viloyati Xuroson’ (IShIDning Afg‘onistondagi bo‘limi) ham, ‘Al-Qoida’ ham tashqi operatsiyalar olib borish, jumladan, AQShga qarshi hujum boshlash niyatida, ammo hozirda ularning hech biri buni amalga oshirishga qodir emas ”, — dedi u.
Eslatib o‘tamiz, avvalroq IShID mamlakatdagi bir qator yirik hujumlar, jumladan Kobul aeroportidagi portlash uchun javobgarlikni o‘z zimmasiga olgandi. Aeroportdagi teraktda 13 nafar amerikalik harbiy halok bo‘lgan.
Afg‘onistonda IShID faolligi kuchayishi fonida “Tolibon” uning jiddiy xavf tug‘dirmasligiga ishontirishda davom etmoqda.
Sentabr oyida AQSh razvedkasi “Al-Qoida” hozirgi vaziyatda Afg‘onistondan tashqarida hujumlar uyushtirishga qodir emasligini aytgandi. “Razvedka hamjamiyatining joriy bahosiga ko‘ra, ‘Al-Qoida’ning imkoniyatlari ancha oldin shu qadar tanazzulga uchraganidan hozir u chet elda hujumlar uyushtira olmaydi”, — degan AQSh Davlat kotibi Entoni Blinken.
Aprel oxirida “Al-Qoida” AQShga qarshi “har tomondan hujum qilish” bilan keng ko‘lamli urush boshlashni va’da qilgan. Terrorchilik tashkiloti vakillari ushbu urushning “AQSh butun islom dunyosidan chiqarib yuborilgunga qadar” davom etishini qayd etgan.
Izoh (0)