“Al-Qoida” terrorchilik guruhi hozirgi vaziyatda Afg‘onistondan tashqarida hujumlar uyushtirishga qodir emas. Bu haqda AQSh Davlat kotibi Entoni Blinken razvedka ma’lumotlariga tayanib ma’lum qildi.

Foto: Getty Images

“Razvedka hamjamiyatining joriy bahosiga ko‘ra, ‘Al-Qoida’ning imkoniyatlari ancha oldin shu qadar tanazzulga uchraganidan hozir u chet elda hujumlar uyushtira olmaydi”, — dedi Blinken AQSh Vakillar palatasining Tashqi ishlar qo‘mitasi tinglovida. Uning ta’kidlashicha, AQSh hukumati bu kabi tahdidlarning takrorlanishiga yo‘l qo‘ymaslik uchun baribir “hushyorlikni saqlab turadi”.

Blinken Afg‘onistonda “Tolibon” tuzgan hukumat tarkibida “xizmat ro‘yxati juda uzun bo‘lgan” kishilar borligini aytdi, misol sifatida u FQB tomonidan qidirilayotgan ichki ishlar vaziri Sirojiddin Haqqoniyni keltirdi. Uning so‘zlariga ko‘ra, AQSh “Tolibon” hukumati bilan u Amerika manfaatlarini ilgari surish-surmasligidan kelib chiqib hamkorlik qiladi.

Davlat kotibi, shuningdek, AQSh ma’muriyati Afg‘oniston xalqiga sog‘liqni saqlash va oziq-ovqat ehtiyojlarini qondirish, shuningdek, ayollar va bolalarni himoya qilish uchun 64 million dollarlik gumanitar yordam berishini ma’lum qildi.

Bundan tashqari, Blinkenning aytishicha, Afg‘onistonda huquqlari xavf ostida qolgan ayollarni qo‘llab-quvvatlashga “to‘liq e’tibor” berish uchun Davlat departamentining yuqori lavozimli amaldorini tayinlash rejalashtirilmoqda.

2001-yil 11-sentabrda “Al-Qoida” jangarilari AQShda qator teraktlar uyushtirgan. Xudkush terrorchilar to‘rtta samolyotni egallab olgan: ulardan ikkitasi Nyu-Yorkdagi Jahon savdo markazi minoralariga, yana biri Vashingtonda Pentagon binosiga urilgan, to‘rtinchi samolyot Pensilvaniyada qulab tushgan. 2977 kishi teraktlar qurboniga aylangan.

O‘shanda Afg‘onistonda hukmronlik qilayotgan “Tolibon” 11-sentabr voqealarini uyushtirgan “Al-Qoida” rahbari Usama bin Ladenni AQShga topshirishdan bosh tortgan. Bu esa AQShning Afg‘onistondagi 20 yillik urushini boshlab berdi. Ko‘plab ekspertlarning fikricha, Afg‘onistonda “Tolibon”ning qayta hokimiyatga ko‘tarilgani xalqaro terrorchi guruhlarning jonlanishiga sabab bo‘lishi mumkin.