Harbiylar tomonidan ag‘darilgan Sudan bosh vaziri Abdulla Xamdok hamda uning rafiqasiga 27-oktabr — hisbga olinganidan bir kun o‘tib uyiga qaytishga ruxsat berildi. Bu haqda bosh vazir kanselyariyasiga tayanib, “Interfaks” xabar berdi.
Xamdok ofisining bayonotida aytilishicha, hukumatning boshqa amaldorlari hibsda qolmoqda, ular qayerda saqlanayotgani noma’lum. Shu bilan birga, bosh vazir va uning rafiqasi Xartumdagi uyida “qattiq qo‘riqlanayotgani” aytildi. Ular uydan chiqishi yoki qo‘ng‘iroq qila olish-olmasligiga aniqlik kiritilmagan.
AQSh davlat departamenti vakili Ned Praysning ma’lum qilishicha, davlat kotibi Entoni Blinken Sudan bosh vaziri ozod etilgach, u bilan telefon orqali suhbatlashgan.
“Davlat kotibi bosh vazirning hibsdan ozod etilishini olqishlagan va Sudan Qurolli kuchlarini hibsdagi barcha yetakchilarni ozod qilishga hamda ularning xavfsizligini ta’minlashga yana bir bor chaqirdi”, — deyiladi xabarda.
Ta’kidlanishicha, Blinken davom etayotgan harbiy to‘ntarish yuzasidan xavotirini bildirgan va qurolli kuchlarni namoyishchilarning harakatlariga javoban vazmin bo‘lishga va zo‘ravonlikdan qochishga chaqirgan.
Shuningdek, g‘arb OAVlari Sudan Fuqarolik aviatsiyasi boshqarmasi 30-oktabrga qadar Xartum aeroportidan amalga oshiriladigan barcha reyslar to‘xtatilgani haqida yozmoqda. “Xartum aeroportiga yo‘naltirilgan va undan amalga oshiriladigan barcha reyslar mamlakatdagi vaziyat sabab 30-oktabrga qadar to‘xtatildi”, — deydi Fuqarolik aviatsiyasi boshqarmasi boshlig‘i Ibrohim Adlan.
Eslatib o‘tamiz, Sudan harbiylari 25-oktabrga o‘tar kechasi mamlakat muvaqqat hukumatining bir qator vazirlarini, jumladan, muvaqqat bosh vazir Abdulla Xamdokni hibsga olgandi.
Sudanda harbiylar va fuqarolik kuchlari o‘rtasidagi munosabatlarda inqiroz bir necha haftadan beri davom etmoqda. Ziddiyatlarni muloqot orqali hal qilishga urinishlar kutilgan natijaga olib kelmagan, qarama-qarshi lagerlar o‘z tarafdorlarini ko‘chalarga olib chiqqan. Norozilik namoyishlari oqibatida yetti kishi halok bo‘lgan va yuzdan ortiq odam jarohat olgani aytilmoqda.
Sudan armiyasi Xartumdagi davlat teleradiostansiyasi binosini nazoratga olgan. Ko‘plab xodimlar hibsga olingan. Poytaxtda mobil aloqa va internet bloklangan.
Izoh (0)