Tinchlik bo‘yicha Nobel mukofotini topshirish marosimi 2020-yilgi tadbirdan farqli o‘laroq, Osloda jonli tartibda o‘tkaziladi. Bu haqda Norvegiya Nobel qo‘mitasiga tayanib, “RBK” xabar berdi.
“Nobel qo‘mitasi 2021-yilda Tinchlik bo‘yicha Nobel mukofotini topshirish marosimi jonli tarzda 10-dekabr kuni Oslo ratushasida o‘tkazilishi bo‘yicha qaror qabul qildi”, — deyiladi xabarda.
Shuningdek, qo‘mita 2021-yilgi laureatlar Mariya Ressa va Dmitriy Muratov marosimga tashrif buyurishiga umid bildirgan. Qoidalarga ko‘ra, ularga medal, diplom va 10 million shved kronasi (1,2 million dollarga yaqin) miqdoridagi pul mukofoti ko‘rsatilgan hujjat topshiriladi.
Eslatib o‘tamiz, 8-oktabr kuni tinchlik bo‘yicha Nobel mukofotiga Rossiyaning “Novaya gazeta” nashri bosh muharriri Dmitriy Muratov va filippinlik jurnalist, Rapple muxolifatchi sayti rahbari Mariya Ressa sazovor bo‘ldi. Nobel mukofoti ularga “demokratiya hamda barqaror tinchlik o‘rnatilishining dastlabki sharti bo‘lgan fikr bildirish erkinligini himoya qilish bo‘yicha intilishlari” uchun berilgan.
Avvalroq pandemiya tufayli 2021-yilda Nobel mukofoti Shvetsiyada topshirilmaydigan bo‘lgani to‘g‘risida xabar berilgandi.
Ma’lumot uchun, adabiyot yo‘nalishi bo‘yicha 2021-yilgi Nobel mukofotiga Buyuk Britaniyada yashab ijod qilayotgan tanzaniyalik yozuvchi Abdurazzoq Gurna loyiq ko‘rilgan. Kimyo bo‘yicha Nobel mukofoti germaniyalik Benjamin List va amerikalik Devid Makmillanga “assimetrik organokatalizni rivojlantirgani uchun” beriladi.Fizika bo‘yicha Nobel mukofotining bir qismi amerikalik iqlimshunos Syukuro Manabe va germaniyalik olim Klaus Xasselmanga Yer iqlimini fizik modellashtirish va global isishning ishonchli tahlili uchun, ikkinchi qismi esa italiyalik fizik Jorjo Pariziga atomlardan sayyoralargacha bo‘lgan fizik tizimlarda tartib va tebranishlarning o‘zaro ta’sirini kashf qilgani uchun beriladi. Iqtisod bo‘yicha 2021-yilgi sovringa amerikalik iqtisodchilar Devid Kard, Joshua Angrist va Xido Imbens sazovor bo‘lgan.
Izoh (0)