Ilon Mask Forbes reytingi tarixidagi eng boy odamga aylandi

Tesla aksiyalari qiymatining o‘sishi tufayli Ilon Maskning boyligi ma’lum vaqt davomida 300 milliard dollarga yaqin bo‘lib turdi, bu esa uni Forbes reytinglari tarixidagi eng boy odamga aylantirdi.

25-oktabr, dushanba kuni bozorlar yopilishida uning jami aktivlari 271,3 milliard dollarni tashkil etdi, bu 22-oktabr, juma kungi savdolar yakuniga nisbatan qariyb 41,7 milliard dollarga ko‘p.

Real vaqt rejimida yangilanadigan Forbes Real Time reytingida 26-oktabr kuni Maskning boyligi 254,9 milliard dollarga tushgani qayd etilgan. Shunga qaramay, uning bundan oldin erishgan darajasi hali ham rekord bo‘lib qolmoqda. Avval Forbes reytingi tarixidagi eng boy odam Amazon asoschisi va sobiq bosh direktori Jeff Bezos bo‘lgan edi. Amazon aksiyalari narxi iyul oyida eng yuqori cho‘qqiga chiqqanida uning boyligi 212 milliard dollarga ko‘tarilgan, hozir esa 196,5 milliard dollarga baholanmoqda.

Forbes talqini bo‘yicha eng boy odamlarning birinchi reytingi 1918-yilda paydo bo‘lgan, o‘shanda nashr 30 ta eng badavlat amerikaliklarning mol-mulkini baholagan. O‘shanda Jon Rokfeller 1,2 milliard dollarlik boylik bilan yetakchiga aylangan (inflyatsiyani hisobga olgan holda 2021-yilda bu miqdor 21 milliard dollarni tashkil etgan bo‘lardi).

1982-yilda jurnal muntazam ravishda birinchi Forbes 400 (eng boy 400 amerikalik ro‘yxati) bilan reytinglar tuzishni boshladi. 1987-yilda sayyoramizdagi eng katta boylik egalarining birinchi ro‘yxati (The World’s Billionaires) e’lon qilindi. O‘sha paytda unga 20 milliard dollarlik boyligi bilan yaponiyalik magnat Sutsumi Yosiaki (hozirgi dollar kursi bo‘yicha taxminan 47 milliard dollar) boshchilik qilgan.

1997-yildan 2008-yilgacha dunyoning eng boy odamlari reytingida Microsoft asoschisi Bill Geyts birinchi o‘rinda turgan. Reytingning eng yuqori cho‘qqisiga chiqqan paytda uning boyligi 36,4 milliard dollarga baholangan (2021-yil kursi bo‘yicha taxminan 60 milliard dollar). 2008-yilda, global moliyaviy inqiroz boshlanganidan so‘ng, Geyts uchinchi o‘ringa tushib ketdi, investor Uorren Baffet reyting yetakchisiga aylandi (62 milliard dollar yoki hozirgi kurs bo‘yicha 77 milliard dollar boylik bilan). 2009-yilda va 2014-yildan 2017-yilgacha Bill Geyts yana birinchi o‘rinni egalladi. 2010—2013-yillarda u meksikalik magnat Karlos Slimdan o‘zib ketdi. Forbes reytingida yetakchilik qilgan vaqtlarda Slimning boyligiga berilgan eng yuqori baho — 2011-yilda 74 milliard dollar (2021-yil kursi bo‘yicha 88 milliard dollar) edi.

2018-yilda Amazon asoschisi Jeff Bezos ilk bor reytingda birinchi o‘rinni egalladi. U keyingi uch yil davomida o‘z pozitsiyasini mustahkamladi. The World’s Billionaires’ning 2021-yil uchun klassik reytingida (yiliga bir marta tuziladi) uning boyligi 177 milliard dollarga baholangan.

Dunyodagi eng boy odamlarning yana bir reytingi Bloomberg agentligining hisob-kitoblariga asoslanadi. Bloomberg Real Time Billionaires ro‘yxati har kuni yangilanadi. 26-oktabr holatiga ko‘ra, agentlik Ilon Maskning boyligini 289 milliard dollarga, Jeff Bezosniki esa 193 milliard dollarga baholagan.

Tesla aksiyalari yangi hisobotlar e’lon qilinganidan keyin ko‘tarila boshladi. 25-oktabrda ma’lum vaqt kompaniyaning bozor kapitallashuvi hatto 1 trillion dollarlik chegarani ham buzishga muvaffaq bo‘ldi. Ushbu ko‘rsatkichga erishishga Hertz avtoulovlarni ijaraga berish servisi uchun 100 mingta elektromobil yetkazib berish kelishuvi haqidagi xabarlar yordam berdi.