Xitoy AQShni “yagona Xitoy” prinsipiga va Tayvan masalasi bo‘yicha majburiyatlariga rioya qilishga, shuningdek, orol bilan har qanday rasmiy aloqalarni zudlik bilan to‘xtatishga chaqiradi. Bu haqda Xitoyning Vashingtondagi elchixonasi bayonotiga tayanib, “RBK” xabar berdi.
26-oktabr kuni AQSh davlat kotibi Entoni Blinken Amerika Tayvanning BMT tizimidagi keng ishtirokini qo‘llab-quvvatlashini ma’lum qilgandi. Uning fikricha, “Tayvanning chiqarib yuborilishi BMTning muhim ishiga va u bilan bog‘liq organlar faoliyatiga putur yetkazadi”.
“Dunyoda bitta Xitoy mavjud va XXR hukumati butun Xitoyni ifodalovchi yagona rasmiy hukumat hisoblanadi. AQShni Tayvan bilan barcha rasmiy aloqalarni, mas’uliyatsiz va noto‘g‘ri bayonotlar berishni to‘xtatishga, shuningdek, Xitoy—Amerika munosabatlaridagi umumiy vaziyatni saqlab qolish, shu bilan birga, Tayvan bo‘g‘ozida tinchlik va barqarorlikni ta’minlash yo‘lida aniq choralarni ko‘rishga chaqiramiz”, — deyiladi elchixona bayonotida.
Shuningdek, bayonotda qayd etilishicha, Tayvanning BMT kabi xalqaro tashkilotlar faoliyatida ishtirok etishi “yagona Xitoy” prinsiplariga mos ravishda amalga oshirilishi kerak. “BMT — bu hukumatlararo xalqaro tashkilot bo‘lib, unga faqat suveren davlatlar qo‘shila oladi. Tayvan bilan bog‘liq muammolar AQSh qadriyatlari deb ataluvchi muammolar emas, balki jiddiy siyosiy muammolar hisoblanadi”, — deyiladi diplomatik missiya xabarida.
Avvalroq The Wall Street Journal AQSh maxsus operatsiya kuchlari va Dengiz piyodalari korpusi kontingenti Tayvanda mahalliy qo‘shinlarni maxfiy ravishda o‘qitayotgani haqida xabar bergandi. Ta’kidlanishicha, AQSh maxsus operatsiya kuchlarining 20 ga yaqin xodimi Tayvan quruqlik qo‘shinlarining kichik guruhini shug‘ullantirmoqda. Dengiz piyodalari, o‘z navbatida, mahalliy dengiz floti bilan ishlayapti. Nashr manbasining aniqlik kiritishicha, AQSh harbiylari Tayvanda kamida bir yildan buyon bo‘lib turibdi.
Izoh (0)