ИШИД Афғонистонда ўз салоҳиятини тиклаб, 6-12 ойдан сўнг АҚШга таҳдид сола бошлаши мумкин. Бу ҳақда Пентагон раҳбарининг сиёсий масалалар бўйича ўринбосари Колин Кол Сенатдаги тинглов чоғида маълум қилди, деб ёзади «Afghanistan.ru»
Колнинг таъкидлашича, «Толибон» ИШИДга қарши тура оладими ёки йўқми, ҳалигача ноаниқ бўлиб қолмоқда. Унга кўра, «Ал-Қоида» томонидан ҳам бир-икки йил ичида АҚШга қарши ҳужумлар уюштириш таҳдиди мавжуд.
Колнинг сўзларига кўра, Афғонистондаги «Ал-Қоида»нинг кучайиши катта муаммога айланиши мумкин, чунки бу гуруҳ «Толибон» билан алоқага эга.
«Айни пайтда разведка ҳамжамиятининг фикрича, ‘Вилояти Хуросон’ (ИШИДнинг Афғонистондаги бўлими) ҳам, ‘Ал-Қоида’ ҳам ташқи операциялар олиб бориш, жумладан, АҚШга қарши ҳужум бошлаш ниятида, аммо ҳозирда уларнинг ҳеч бири буни амалга оширишга қодир эмас », — деди у.
Эслатиб ўтамиз, аввалроқ ИШИД мамлакатдаги бир қатор йирик ҳужумлар, жумладан Кобул аэропортидаги портлаш учун жавобгарликни ўз зиммасига олганди. Аэропортдаги терактда 13 нафар америкалик ҳарбий ҳалок бўлган.
Афғонистонда ИШИД фаоллиги кучайиши фонида «Толибон» унинг жиддий хавф туғдирмаслигига ишонтиришда давом этмоқда.
Сентябрь ойида АҚШ разведкаси «Ал-Қоида» ҳозирги вазиятда Афғонистондан ташқарида ҳужумлар уюштиришга қодир эмаслигини айтганди. «Разведка ҳамжамиятининг жорий баҳосига кўра, ‘Ал-Қоида’нинг имкониятлари анча олдин шу қадар таназзулга учраганидан ҳозир у чет элда ҳужумлар уюштира олмайди», — деган АҚШ Давлат котиби Энтони Блинкен.
Апрель охирида «Ал-Қоида» АҚШга қарши «ҳар томондан ҳужум қилиш» билан кенг кўламли уруш бошлашни ваъда қилган. Террорчилик ташкилоти вакиллари ушбу урушнинг «АҚШ бутун ислом дунёсидан чиқариб юборилгунга қадар» давом этишини қайд этган.
Изоҳ (0)