“Burgut”larni yenga olmagan “ajdarlar”, “Barselona”dan ketmaydigan Kuman va Drogbaning rekordini yangilagan Saloh. Eng so‘nggi sport yangiliklari

Dunyo va o‘zbek sportiga oid 25-oktabr kunining eng muhim xabarlari dayjesti bilan tanishing.

O‘zbekiston

Italiyaning Yezolo shahrida kikboksing bo‘yicha jahon chempionati bo‘lib o‘tdi. Unda ishtirok etgan o‘zbekistonliklar sportchilar 1 ta kumush va 5 ta bronza medalini qo‘lga kiritdi.

Jahon birinchiligida 50 dan ortiq davlatdan 4 mingdan ziyod sportchilar ishtirok etgan.

Igor Shkvirin “Turon” bosh murabbiyligidan ketdi

“Turon” bosh murabbiyi Igor Shkvirin jamoa boshqaruvidan ketdi. Bu haqda Yaypan klubi matbuot xizmati xabar berdi.

Qayd etilishicha, rahbariyat va murabbiylar shtabi vakillari o‘rtasida o‘tkazilgan navbatdan tashqari yig‘ilishda jamoaning qoniqarsiz natijalari ko‘rib chiqilgan va Shkvirin o‘z xohishiga ko‘ra jamoa murabbiyligidan ketgan.

“Turon” 23-turdan keyin 13 ochko bilan musobaqa jadvalida so‘nggi o‘rinda bormoqda.

“Nasaf” Andijonda ochko yo‘qotdi

25-oktabr kuni Superliganing 23-turidan o‘rin olgan so‘nggi o‘yin bo‘lib o‘tdi. Unda Qarshining “Nasaf” (“ajdarlar”) klubi tortishuvlarga boy bo‘lgan o‘yinda “Andijon”dan (“burgutlar”) ustun keldi.

Jahon

“Barselona” bosh murabbiyi Ronald Kuman “Real”dan uchralgan mag‘lubiyatdan so‘ng iste’foga chiqarilmaydi, deb yozmoqda Marca.

Nashrga ko‘ra, “El-Klasiko”da mag‘lub bo‘lish ehtimoli oldindan mavjud bo‘lgan, shu bois bu narsa mutaxassisning jamoadagi pozitsiyasiga ta’sir qilmaydi.

Kumanning kelajagi ko‘p jihatdan jamoaning keyingi uchta o‘yindagi natijalariga bog‘liq bo‘ladi. “Ko‘k-anorrangilar” La Ligada “Rayo Valekano” va “Alaves” bilan bahs yuritsa, Chempionlar Ligasida “Dinamo K”ga qarshi maydonga tushadi.

Yurgenn Klopp “Liverpul” boshqaruvidagi 200-g‘alabasini qo‘lga kiritdi

Angliya Premyer Ligasining 9-turi doirasida “Manchester Yunayted” ustidan qozonilgan 5:0 hisobidagi g‘alaba “Liverpul” bosh murabbiyi Yurgen Klopp uchun jamoa boshqaruvidagi 200-g‘alaba bo‘ldi.

Germaniyalik mutaxassis klub tarixida bunday natijaga eng tez erishgan murabbiyga aylandi, Kloppga 200 ta g‘alabani qo‘lga kiritish uchun 331 o‘yin kerak bo‘ldi.

Bu borada Kloppdan oldingi eng yaxshi natija 333 ta o‘yinda 200 ta g‘alabaga erishgan Kenni Dalglish tegishli edi.

Saloh Drogbaning rekordini yangiladi

“Liverpul” hujumchisi Muhammad Saloh APL 9-turi doirasidagi “Manchester Yunayted”ga qarshi o‘yinda (5:0) het-trik qayd etdi.

Shu tariqa misrlik futbolchi Premyer Ligadagi gollari sonini 107 taga yetkazib oldi. Saloh ushbu ko‘rsatkich borasida afrikalik futbolchilar orasida rekordni yangiladi. U bu yo‘lda “Chelsi” sobiq hujumchisi Didye Drogbani (104 gol) ortda qoldirdi. Uchinchi o‘rinda esa senegallik Sadio Mane (100 gol) bormoqda.

“Manchester Yunayted” Sulsherni iste’foga chiqarishi mumkin, uning o‘rniga asosiy nomzod sifatida Konte tilga olinmoqda

Ole-Gunnar Sulsher “Manchester Yunayted” bosh murabbiyligidan ketishi mumkin, deb yozmoqda Fabrisio Romano.

Jurnalistga ko‘ra, klub rahbariyati norvegiyalik mutaxassisni APLning 10-turidan o‘rin olgan “Tottenhem”ga qarshi o‘yingacha iste’foga chiqarish haqida jiddiy o‘ylay boshlagan. Yakuniy qaror yaqin vaqtlar ichida e’lon qilinishi kutilmoqda.

Hozirda jamoa boshqaruvini o‘z qo‘liga olishi mumkin bo‘lgan nomzodlar orasida Antonio Konte tilga olinmoqda.

“Manchester Yunayted” Sulsher boshqaruvida Premyer Liganing so‘nggi 9 o‘yinining 5 tasida mag‘lubiyatga uchradi va ketma-ket 4 o‘yindan beri g‘alaba qozona olmayapti. Jamoa 9-tur doirasida o‘z maydonida “Liverpul”dan javobsiz 5 ta gol o‘tkazib yubordi.

Holand 2021-yil oxirigacha boshqa maydonga tusha olmasligi mumkin

“Borussiya D” hujumchisi Erling Holand son qismidagi jarohat tufayli 2021-yilda boshqa maydonga tushmasligi mumkin. Bu haqda Bild xabar berdi.

Qayd etilishicha, ushbu holda Holand 6 haftagacha maydonga qayta olmaydi.

Avvalroq Holandning bir necha haftaga safdan chiqqani haqida xabar berilgandi. Erling bungacha sentabr oyida ham jarohat olib, bir oy muddatga safdan chiqqandi va oktabr o‘rtasida maydonga qaytgandi.