Дунё ва ўзбек спортига оид 25 октябрь кунининг энг муҳим хабарлари дайжести билан танишинг.
Ўзбекистон
Кикбоксинг бўйича жаҳон чемпионатида 6 та медал қўлга киритилди
Италиянинг Езоло шаҳрида кикбоксинг бўйича жаҳон чемпионати бўлиб ўтди. Унда иштирок этган ўзбекистонликлар спортчилар 1 та кумуш ва 5 та бронза медалини қўлга киритди.
Жаҳон биринчилигида 50 дан ортиқ давлатдан 4 мингдан зиёд спортчилар иштирок этган.
Игорь Шквирин «Турон» бош мураббийлигидан кетди
«Турон» бош мураббийи Игорь Шквирин жамоа бошқарувидан кетди. Бу ҳақда Яйпан клуби матбуот хизмати хабар берди.
Қайд этилишича, раҳбарият ва мураббийлар штаби вакиллари ўртасида ўтказилган навбатдан ташқари йиғилишда жамоанинг қониқарсиз натижалари кўриб чиқилган ва Шквирин ўз хоҳишига кўра жамоа мураббийлигидан кетган.
«Турон» 23-турдан кейин 13 очко билан мусобақа жадвалида сўнгги ўринда бормоқда.
«Насаф» Андижонда очко йўқотди
25 октябрь куни Суперлиганинг 23-туридан ўрин олган сўнгги ўйин бўлиб ўтди. Унда Қаршининг «Насаф» («аждарлар») клуби тортишувларга бой бўлган ўйинда «Андижон»дан («бургутлар») устун келди.
Жаҳон
«Реал»дан учралган мағлубиятдан сўнг Рональд Куман истеъфога чиқарилмайди
«Барселона» бош мураббийи Рональд Куман «Реал»дан учралган мағлубиятдан сўнг истеъфога чиқарилмайди, деб ёзмоқда Marca.
Нашрга кўра, «Эль-Класико»да мағлуб бўлиш эҳтимоли олдиндан мавжуд бўлган, шу боис бу нарса мутахассиснинг жамоадаги позициясига таъсир қилмайди.
Куманнинг келажаги кўп жиҳатдан жамоанинг кейинги учта ўйиндаги натижаларига боғлиқ бўлади. «Кўк-аноррангилар» Ла Лигада «Райо Валекано» ва «Алавес» билан баҳс юритса, Чемпионлар Лигасида «Динамо К»га қарши майдонга тушади.
Юргенн Клопп «Ливерпуль» бошқарувидаги 200-ғалабасини қўлга киритди
Англия Премьер Лигасининг 9-тури доирасида «Манчестер Юнайтед» устидан қозонилган 5:0 ҳисобидаги ғалаба «Ливерпуль» бош мураббийи Юрген Клопп учун жамоа бошқарувидаги 200-ғалаба бўлди.
Германиялик мутахассис клуб тарихида бундай натижага энг тез эришган мураббийга айланди, Клоппга 200 та ғалабани қўлга киритиш учун 331 ўйин керак бўлди.
Бу борада Клоппдан олдинги энг яхши натижа 333 та ўйинда 200 та ғалабага эришган Кенни Далглиш тегишли эди.
Салоҳ Дрогбанинг рекордини янгилади
«Ливерпуль» ҳужумчиси Муҳаммад Салоҳ АПЛ 9-тури доирасидаги «Манчестер Юнайтед»га қарши ўйинда (5:0) ҳет-трик қайд этди.
Шу тариқа мисрлик футболчи Премьер Лигадаги голлари сонини 107 тага етказиб олди. Салоҳ ушбу кўрсаткич борасида африкалик футболчилар орасида рекордни янгилади. У бу йўлда «Челси» собиқ ҳужумчиси Дидье Дрогбани (104 гол) ортда қолдирди. Учинчи ўринда эса сенегаллик Садио Мане (100 гол) бормоқда.
«Манчестер Юнайтед» Сульшерни истеъфога чиқариши мумкин, унинг ўрнига асосий номзод сифатида Конте тилга олинмоқда
Оле-Гуннар Сульшер «Манчестер Юнайтед» бош мураббийлигидан кетиши мумкин, деб ёзмоқда Фабрицио Романо.
Журналистга кўра, клуб раҳбарияти норвегиялик мутахассисни АПЛнинг 10-туридан ўрин олган «Тоттенҳэм»га қарши ўйингача истеъфога чиқариш ҳақида жиддий ўйлай бошлаган. Якуний қарор яқин вақтлар ичида эълон қилиниши кутилмоқда.
Ҳозирда жамоа бошқарувини ўз қўлига олиши мумкин бўлган номзодлар орасида Антонио Конте тилга олинмоқда.
«Манчестер Юнайтед» Сульшер бошқарувида Премьер Лиганинг сўнгги 9 ўйинининг 5 тасида мағлубиятга учради ва кетма-кет 4 ўйиндан бери ғалаба қозона олмаяпти. Жамоа 9-тур доирасида ўз майдонида «Ливерпуль»дан жавобсиз 5 та гол ўтказиб юборди.
Ҳоланд 2021 йил охиригача бошқа майдонга туша олмаслиги мумкин
«Боруссия Д» ҳужумчиси Эрлинг Ҳоланд сон қисмидаги жароҳат туфайли 2021 йилда бошқа майдонга тушмаслиги мумкин. Бу ҳақда Bild хабар берди.
Қайд этилишича, ушбу ҳолда Ҳоланд 6 ҳафтагача майдонга қайта олмайди.
Аввалроқ Ҳоланднинг бир неча ҳафтага сафдан чиққани ҳақида хабар берилганди. Эрлинг бунгача сентябрь ойида ҳам жароҳат олиб, бир ой муддатга сафдан чиққанди ва октябрь ўртасида майдонга қайтганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)