So‘nggi daqiqalarda autsayderni yer tishlatgan “qaldirg‘ochlar”, faoliyatida ilk marta 6 ta gol o‘tkazgan Mourinyo va uyini o‘g‘ri urib ketgan Dibala. Eng so‘nggi sport yangiliklari

Dunyo va o‘zbek sportiga oid 22-oktabr kunining eng muhim xabarlari dayjesti bilan tanishing.

O‘zbekiston

Dzyudo federatsiyasi Diyorbek O‘rozboyevning diskvalifikatsiyasi borasida munosabat bildirdi

O‘zbekiston dzyudo federatsiyasi matbuot xizmati Rio—2016 Olimpiadasining bronza medali sohibi Diyorbek O‘rozboyevda doping aniqlangani masalasi bo‘yicha rasmiy munosabat bildirdi.

Munosabatda O‘rozboyevning dzyudo bo‘yicha milliy terma jamoa a’zosi ekanligi ta’kidlab o‘tilgan. Biroq O‘zbekiston dzyudo federatsiyasi Diyorbek 2021-yilning fevral oyidan beri terma jamoa yig‘inlarida ishtirok etmayotgani sabab O‘zbekiston dzyudo milliy terma jamoasi a’zoligidan chiqarilganini ta’kidlagan.

Avvalroq O‘zbekiston Milliy antidoping agentligi tomonidan o‘tkazilgan tahlillardan keyin Diyorbek O‘rozboyev taqiqlangan modda iste’mol qilgani va shu sabab 3 yilga diskvalifikatsiya qilingani haqida xabar qilingandi.

Superliganing 23-turidan o‘rin olgan ikki o‘yin bo‘lib o‘tdi

22-oktabr kuni Superliganing 23-turidan o‘rin olgan ikki o‘yin bo‘lib o‘tdi. Unda “Surxon” o‘z maydonida “Qizilqum”dan ustun keldi. “Bunyodkor” esa Toshkentda so‘nggi daqiqalarda “Turon”ni taslim etdi.

Turning qolgan o‘yinlari 23—25-oktabr kunlari bo‘lib o‘tadi.

Jahon

Holand bir necha haftaga safdan chiqdi

“Borussiya D” hujumchisi Erling Holand jarohati sabab bir necha haftaga safdan chiqdi. Bu haqda jamoa bosh murabbiyi Marko Roze ma’lum qildi.

Norvegiyalik futbolchining mushaklari shikastlangan va yaqin oradagi o‘yinlarda “arilar”ga yordam bera olmaydi.

Qayd etish kerak, Holand sentabr oyida ham jarohat olib, bir oy muddatga safdan chiqqandi va oktabr o‘rtasida maydonga qaytgandi.

Chempionlar Ligasida hafta ramziy terma jamoasi e’lon qilindi

Chempionlar Ligasi 3-tur yakunlari bo‘yicha hafta ramziy (fentezi) terma jamoasi e’lon qilindi.

Terma jamoa quyidagicha ko‘rinish oldi:

Ramosning noyabr oyida “PSJ”da debyut qilishi kutilmoqda

“PSJ” himoyachisi Serxio Ramos jarohatidan tiklanishda davom etmoqda.

Le Parisien’ga ko‘ra, ispaniyalik futbolchi 22-oktabr kuni individual tarzda mashg‘ulot o‘tkazgan. Ramos kelasi hafta boshida “PSJ”ning umumiy guruhiga qo‘shilishi kutilmoqda.

Ta’kidlanishicha, Ramos “PSJ”dagi debyutini noyabr oyida o‘tkazadi. Qayd etish kerak, 35 yoshli futbolchi mushaklaridagi jarohati tufayli hamon yangi klubida maydonga tushgani yo‘q.

Mourinyo jamoasi ilk marta 6 ta gol o‘tkazib yubordi

Joze Mourinyo boshchiligidagi “Roma” Konferensiyalar Ligasi doirasidagi o‘yinda “Budyo Glimpt”ga 1:6 hisobida yutqazdi.

Shu tariqa Mourinyo ustozlik qilgan jamoa ilk marta o‘z darvozasidan 6 ta gol o‘tkazib yubordi. Bungacha portugaliyalik mutaxassis boshqargan jamoalar 5 tadan ko‘p gol o‘tkazmagandi, shu paytga qadar uning faoliyatidagi eng yirik hisob 2010-yilda qayd etilgandi: uning qo‘l ostidagi “Real” “Barselona”ga 0:5 hisobida mag‘lub bo‘lgandi.

“Budyo Glimpt”ga qarshi bahs Joze uchun faoliyatidagi 1008-o‘yin bo‘ldi.

Brunu Fernandesh “Liverpul”ga qarshi o‘yinni o‘tkazib yuborishi mumkin

“Manchester Yunayted” yarim himoyachisi Brunu Fernandesh Angliya Premyer Ligasining 9-turidan o‘rin olgan “Liverpul”ga qarshi o‘yinni o‘tkazib yuborishi mumkin.

“Qizillar” bosh murabbiyi Ole-Gunnar Sulsherning ta’kidlashicha, portugaliyalik futbolchi Chempionlar Ligasi doirasidagi “Atalanta”ga qarshi o‘yinda kichik jarohat olgan. Bu uning yakshanba oqshomida “Liverpul”ga qarshi kechadigan bahsda maydonga tushishini so‘roq ostida qoldirmoqda.

Eslatib o‘tamiz, “Man Yunayted” — “Liverpul” uchrashuvi 24-oktabr kuni soat 20:30 da boshlanadi.

Dibalaning uyini o‘g‘ri urib ketdi

“Yuventus” hujumchisi Paulo Dibalaning uyida o‘g‘rilik yuz berdi.

La Gazzetta dello Sport nashrining xabar berishicha, o‘g‘rilar seshanba kuni kechqurun 27 yoshli futbolchining Turin yaqinidagi villasiga oyna orqali kirgan.

Bosqinchilarni hududni kuzatayotgan qo‘riqchi payqab qolgan. Hozircha zarar qiymati noma’lum. Biroq o‘g‘rilar Dibalaga tegishli bo‘lgan soat kolleksiyasini olib chiqib ketgani taxmin qilinmoqda.