AQSh Davlat departamenti Amerika immigratsion vizasini olishni xohlovchi Rossiya fuqarolarini “Homeless Nationalities” — so‘zma-so‘z tarjima qilganda “uysiz millatlar” toifasiga kiritdi. Bu haqda departament saytiga joylangan hujjatga tayanib Meduza xabar berdi.
Ushbu toifaga AQSh konsullik idoralariga ega bo‘lmagan yoki siyosiy vaziyat birmuncha “noaniq va beqaror” bo‘lgan mamlakatlarning Amerika vizasini so‘rab murojaat etuvchi fuqarolari kiritiladi. Bunday sharoitda amerikalik diplomatlar o‘sha mamlakatlarda turib, viza arizalarini ko‘rib chiqa olmaydi.
AQSh Davlat departamenti Rossiyadan tashqari Kuba, Eritreya, Eron, Liviya, Somali, Janubiy Sudan, Suriya, Venesuela va Yamanni ushbu toifadagi davlatlar ro‘yxatiga kiritgan.
Rossiya fuqarolariga Amerika immigratsion vizalarini olish uchun AQShning Varshavadagi konsullik idoralariga murojaat qilish tavsiya qilindi. Boshqa mamlakatlarda yashovchi Rossiya fuqarolari viza olish uchun o‘zi yashab turgan mamlakatdagi AQSh konsulxonasiga murojaat qilishi mumkin.
Rossiya Tashqi ishlar vazirligi matbuot kotibi Mariya Zaxarova Telegram’da yozishicha, AQSh Davlat departamenti bu qarori bilan “oilalar va qarindoshlarga zarba” bergan, Amerika hukumati “XXI asr uchun oddiy texnik protsedurani haqiqiy do‘zaxga aylantirgan”.
May oyida Rossiya hukumati AQSh va Chexiyani Rossiyaga nisbatan “xatti -harakatlari do‘stona bo‘lmagan” davlatlar ro‘yxatiga kiritgandi. Bunday mamlakatlarga o‘z diplomatik vakolatxonalarida rossiyalik xodimlarni ishga yollash taqiqlanadi. AQShning Rossiyadagi elchisi Jon Sallivan elchixonadagi xodimlar sonining qisqartirilishi tufayli AQSh Rossiyada konsullik xizmatlarini ko‘rsatishni butunlay to‘xtatishi haqida ogohlantirgan.
12-maydan AQShning Moskvadagi elchixonasi noimmigratsion vizalar uchun arizalar qabul qilishni to‘xtatdi, faqatgina diplomatik safarlar bundan istisno.
Moskva va Vashington o‘rtasidagi munosabatlarning keskinlashuvi so‘nggi marta 15-aprel kuni, Amerika prezidenti Jo Bayden Rossiyaga nisbatan yangi sanksiyalar kiritganidan keyin yuz berdi. Yangi sanksiyalar Rossiyaning AQShda 2020-yilgi prezidentlik saylovlariga aralashishi, AQSh hukumat idoralariga qilingan kiberhujum va Rossiyaning Afg‘onistondagi amerikaliklarga qarshi “Tolibon” jangarilari bilan til biriktirgani bilan bog‘liq.
Rossiya 21-aprel kuni Moskvadagi AQSh elchixonasining o‘n nafar xodimini persona non grata deb e’lon qildi. AQSh ham xuddi shu shartlar bilan 10 nafar rossiyalik diplomatni mamlakatdan chiqarib yubordi.