Amerikaning Rossiyadagi elchixonasi 12-maydan boshlab diplomatik vizalardan tashqari barcha noimmigratsion vizalar uchun arizalarni ko‘rib chiqishni to‘xtatadi. Bu haqda elchixona veb-saytiga tayanib, Meduza xabar berdi.
“Rossiya hukumatining xatti-harakatlari tufayli konsullik xodimlarini 75 foizga qisqartirishga majbur bo‘ldik”, — dedi AQShning Rossiyadagi elchixonasi.
Diplomatik vakolatxonaning veb-saytida e’lon qilingan ingliz tilidagi xabarga ko‘ra, elchixona ushbu vaziyatda AQSh fuqarolari uchun xizmatlar ko‘rsatishda, jumladan, pasportlarni almashtirish va tug‘ilganlik to‘g‘risidagi guvohnomani berishda muammolar bo‘lishi mumkinligi haqida ogohlantiradi.
AQSh elchixonasi, shuningdek, pandemiya tufayli yangisini rasmiylashtirmasdan, muddati o‘tgan viza bilan Rossiyada qolishga ruxsat berilgan Amerika fuqarolari 15-iyunga qadar (yangi qoidalar amal qilish muddati) Rossiya Federatsiyasini tark etishi yoki mamlakatda qonuniy qolish uchun zarur bo‘lgan hujjatlarni rasmiylashtirish bilan o‘zlari mustaqil shug‘ullanishi kerakligini eslatib o‘tdi.
So‘nggi vaqtlarda AQShning Rossiyadagi elchixonasi immigratsion va noimmigratsion vizalarni faqat murojaat etuvchilar bilan suhbat talab qilinmagan hollarda berayotgan edi.
Rossiya 21-aprel kuni Moskvadagi AQSh elchixonasining o‘n nafar xodimini persona non grata deb e’lon qildi. Ular 21-mayga qadar mamlakatni tark etishi kerak. AQSh ham xuddi shu shartlar bilan 10 nafar rossiyalik diplomatni mamlakatdan chiqarib yubordi.
Bundan tashqari, Rossiya AQSh diplomatik vakolatxonalariga ma’muriy va texnik xodimlarni Rossiya Federatsiyasi va uchinchi mamlakatlar fuqarolaridan yollashni taqiqladi. “Kommersant”ning yozishicha, AQShning Rossiyadagi diplomatik vakolatxonalarida 450 kishi ishlaydi, ularning qanchasi rossiyalik ekani noma’lum, ammo gap o‘nlab xodimlar haqida ketmoqda. AQSh xorijdagi diplomatik vakolatxonalarining deyarli barcha ma’muriy va texnik xodimlarini o‘sha mamlakatdan yollaydi. Avvalgi safar, Moskva 1986-yilda xuddi shunday cheklovlarni joriy qilganda AQSh elchisi ishga o‘zi mashina haydab borishiga, uning xotini esa ziyofatlarda mehmonlarga o‘zi xizmat qilishga majbur bo‘lgan.
Moskva va Vashington o‘rtasidagi munosabatlarning keskinlashuvi so‘nggi marta 15-aprel kuni, Amerika prezidenti Jo Bayden Rossiyaga nisbatan yangi sanksiyalar kiritganidan keyin yuz berdi. Yangi sanksiyalar Rossiyaning AQShdagi 2020-yilgi prezidentlik saylovlariga aralashishi, AQSh hukumat idoralariga qilingan kiberhujum va Rossiyaning Afg‘onistondagi amerikaliklarga qarshi “Tolibon” jangarilari bilan til biriktirgani bilan bog‘liq. Oq uy fevral oyida Rossiyaning ushbu harakatlari uchun AQSh rasmiylari unga qarshi sanksiyalar rejalashtirayotganini aytgandi.