Ahmad Qodirov fondi “krapoviy beret” sinovlarida yuzaga kelgan ommaviy mushtlashuvda ishtirok etgan Checheniston maxsus bo‘linmalari komandirlari Anzor Bisayev va Saydi Lorsankayevga Mercedes avtomobillarini sovg‘a qildi. Bu haqida Chechenistonning milliy siyosat, tashqi aloqalar, matbuot va axborot vaziri Ahmad Dudayev ma’lum qildi, deb yozadi Meduza.
“Ularning ikkisi ham Chechenistonning birinchi prezidenti, Rossiya qahramoni Ahmad Xoji Qodirov yo‘lida sodiq xizmat qilmoqda. Egilmas iroda, mardlik va ulkan jasorat ularga o‘z xizmatida yuqori natijalarga erishishda yordam bermoqda. ‘Krapoviy beret — maxsus bo‘linma xizmatchisi jasoratining oliy ramzidir. Anzor va Saydi unga 100 foiz loyiq ekanligini ko‘rsatdi”, — deyiladi xabarda.
“Krapoviy beret” uchun sinovlar 11—15-oktabr kunlari “Rosgvardiya”ning Stavrapoldagi “Tambukan” o‘quv markazi bazasida o‘tkazilgan. Unda “Rosgvardiya”ning Shimoliy-Kavkaz okrugi maxsus bo‘linmasining yuzdan ortiq xizmatchisi ishtirok etgan. Sinov yakunlari bo‘yicha 38 nafar jangchi, jumladan, chechinistonlik xizmatchilar ham “krapoviy beret”ga loyiq ko‘rilgan.
“Komsomolskaya Pravda” muxbiri Aleksandr Kotsning aytishicha, “krapoviy beret”ga nomzod chechenistonliklar sinovning bir qismi hisoblangan marsh-yurish davomida avtomobilda harakatlangan. Natijada Checheniston harbiy xizmatchilari va sinovlarning boshqa viloyatlardan kelgan ishtirokchilari o‘rtasida janjal yuzaga kelgan. Mushtlashuv videosi ijtimoiy tarmoqlarda tarqalgan. Kots, shuningdek, chechenistonlik ayrim ishtirokchilarda boshqa sinovlarni bosib o‘tishda muammolar yuzaga kelgan, ammo ular baribir “krapoviy beret”ni olganini aytdi.
“Rosgvardiya” rasmiy vakili Valeriy Gribakinning ma’lum qilishicha, sinovlarda “biror janjal, buning ustiga ommaviy qarama-qarshilik” sodir bo‘lmagan. Sinovlarni nazorat qilib boruvchi “Krapoviy beret” kengashi ham ishtirokchilar o‘rtasida mojaro yuz bermaganini bildirgan.
Ma’lumot uchun, “Krapoviy beret” — forma bosh kiyimi. U SSSR IIV maxsus bo‘linmalarida xizmat qilayotgan harbiy xizmatchilarning oliy formasi hisoblangan. 1991-yildan boshlab sobiq sovet tarkibida bo‘lgan qator davlatlarda ham saqlanib qolgan. Mazkur bosh kiyim murakkab sinovlardan o‘tgan xizmatchilarga topshiriladi va g‘urur ramzi hisoblanadi.
Izoh (0)