Rossiyada bir sutkada 1072 kishi koronavirusdan vafot etdi. COVID-o‘limlar soni ketma-ket oltinchi kun mingtadan ortdi

Rossiyada 24-oktabr Toshkent vaqti bilan soat 13:15 holatiga ko‘ra, bir sutkada 35 660 kishida COVID-19 aniqlandi. Bu haqda koronavirusga qarshi kurash bo‘yicha federal tezkor shtab ma’lumotiga tayanib, Meduza xabar berdi.

COVID-19 bilan kasallanish bo‘yicha yangi holatlarning aksariyati Moskva (+5279 kishi) va Sankt-Peterburgda (+3297) qayd etilgan. Moskva viloyatida pandemiya boshidan beri birinchi marta uch mingdan ortiq (+3030), Samara viloyatida ham birinchi marta mingdan ortiq (+1093) yangi holat aniqlangan.

Avvalgi sutkada Rossiyada 37 mingdan ortiq kishida koronavirus qayd etilgandi. Rossiyaning COVID-19 ga qarshi kurash bo‘yicha federal tezkor shtabi ma’lumotlariga ko‘ra, mamlakatda pandemiya boshidan beri COVID-19 yuqtirganlarning umumiy soni 8 241 643 nafarni tashkil etmoqda.

O‘tgan bir kecha-kunduzda Rossiyada 1072 kishi koronavirusdan vafot etdi. Mamlakatda 19-oktabrdan beri har kuni COVID-19 tufayli mingdan ortiq o‘lim qayd etilgan, pandemiya boshidan buyon jami 230 600 kishi kasallik qurboni bo‘lgan, deyiladi tezkor shtab ma’lumotlarida.

Shuningdek, o‘tgan sutkada Rossiyada 22 784 kishi koronavirusdan tuzaldi. Pandemiya boshidan beri kasallikdan sog‘ayganlar soni 7 165 921 kishini tashkil etdi, deyiladi xabarda.

Rossiya prezidenti Vladimir Putin mamlakatda koronavirus infeksiyasi bilan kasallanish holatlari ortayotgani sabab 30-oktabrdan 7-noyabrga qadar ish kunini ishga chiqilmaydigan haftalik deya e’lon qilgan. Epidemiologik vaziyat keskin tus olgan viloyatlarda ishlanmaydigan haftalikni oldinroq joriy etishga ruxsat berilgan. Masalan, Moskva va Moskva viloyatida ishga chiqilmaydigan kunlar 28-oktabrdan boshlanadi.

Avvalroq Rossiyada COVID-19 ning yangi to‘lqini yuz berayotgani, bunga koronavirusning delta (“hindcha”) shtammi bilan bog‘liq vaziyat sabab bo‘lgani to‘g‘risida xabar berilgandi.