АҚШ Давлат департаменти Америка иммиграцион визасини олишни хоҳловчи Россия фуқароларини «Homeless Nationalities» — сўзма-сўз таржима қилганда «уйсиз миллатлар» тоифасига киритди. Бу ҳақда департамент сайтига жойланган ҳужжатга таяниб Meduza хабар берди.
Ушбу тоифага АҚШ консуллик идораларига эга бўлмаган ёки сиёсий вазият бирмунча «ноаниқ ва беқарор» бўлган мамлакатларнинг Америка визасини сўраб мурожаат этувчи фуқаролари киритилади. Бундай шароитда америкалик дипломатлар ўша мамлакатларда туриб, виза аризаларини кўриб чиқа олмайди.
АҚШ Давлат департаменти Россиядан ташқари Куба, Эритрея, Эрон, Ливия, Сомали, Жанубий Судан, Сурия, Венесуэла ва Яманни ушбу тоифадаги давлатлар рўйхатига киритган.
Россия фуқароларига Америка иммиграцион визаларини олиш учун АҚШнинг Варшавадаги консуллик идораларига мурожаат қилиш тавсия қилинди. Бошқа мамлакатларда яшовчи Россия фуқаролари виза олиш учун ўзи яшаб турган мамлакатдаги АҚШ консулхонасига мурожаат қилиши мумкин.
Россия Ташқи ишлар вазирлиги матбуот котиби Мария Захарова Telegram’да ёзишича, АҚШ Давлат департаменти бу қарори билан «оилалар ва қариндошларга зарба» берган, Америка ҳукумати «XXI аср учун оддий техник процедурани ҳақиқий дўзахга айлантирган».
Май ойида Россия ҳукумати АҚШ ва Чехияни Россияга нисбатан «хатти -ҳаракатлари дўстона бўлмаган» давлатлар рўйхатига киритганди. Бундай мамлакатларга ўз дипломатик ваколатхоналарида россиялик ходимларни ишга ёллаш тақиқланади. АҚШнинг Россиядаги элчиси Жон Салливан элчихонадаги ходимлар сонининг қисқартирилиши туфайли АҚШ Россияда консуллик хизматларини кўрсатишни бутунлай тўхтатиши ҳақида огоҳлантирган.
12 майдан АҚШнинг Москвадаги элчихонаси ноиммиграцион визалар учун аризалар қабул қилишни тўхтатди, фақатгина дипломатик сафарлар бундан истисно.
Москва ва Вашингтон ўртасидаги муносабатларнинг кескинлашуви сўнгги марта 15 апрель куни, Америка президенти Жо Байден Россияга нисбатан янги санкциялар киритганидан кейин юз берди. Янги санкциялар Россиянинг АҚШда 2020 йилги президентлик сайловларига аралашиши, АҚШ ҳукумат идораларига қилинган киберҳужум ва Россиянинг Афғонистондаги америкаликларга қарши «Толибон» жангарилари билан тил бириктиргани билан боғлиқ.
Россия 21 апрель куни Москвадаги АҚШ элчихонасининг ўн нафар ходимини persona non grata деб эълон қилди. АҚШ ҳам худди шу шартлар билан 10 нафар россиялик дипломатни мамлакатдан чиқариб юборди.
Изоҳ (0)