Germaniyada Zaksenxauzen konslagerining sobiq qo‘riqchisi, 100 yoshli Yozef S. ustidan sud boshlandi.
Yozef S. Ikkinchi jahon urushi paytida lagerdagi 3 518 mahbusning o‘ldirilishida ishtirok etganlikda ayblanmoqda. Prokuratura ma’lumotlariga ko‘ra, u sovet harbiy asirlarini shaxsan otib tashlagan va odamlarni majburlab gaz kameralariga yuborgan.
Sud jarayoni Brandenburg-Gyorden qamoqxonasi gimnaziyasida xavfsizlik choralari kuchaytirilgan holda o‘tkazilmoqda. Yozef S. tinglovga nogironlar aravachasida, qo‘lida portfel bilan olib kelindi.
Yozef S. 1942-yilda Zaksenxauzen konslagerida xizmat qila boshlaganida 21 yoshda bo‘lgan. 1936—1945-yillar orasida lager 200 mingdan ziyod odamni, shu jumladan, yahudiylarni, lo‘lilarni, rejimga qarshi bo‘lganlarni o‘z ichiga olgan.
Ayblanuvchi haqida kam narsa ma’lum. Bild nashrining yozishicha, u 1947-yilda asirlikdan ozod qilingan va o‘sha paytda Sharqiy Germaniya hududiga kirgan Brandenburgda chilangar bo‘lib ishlagan. Natsistlar jinoyatlarini tergov qilish markaziy bo‘linmasi uning ishini 2019-yil aprelida Brandenburg ma’muriyatiga topshirdi va unga qarshi shu yilning 26-yanvarida ayblov e’lon qilindi.
Yozef S.ning yoshiga qaramay, tibbiy ko‘rik uni kuniga 2,5 soat mobaynida jarayonda ishtirok eta oladi deb tasdiqladi. Ayblanuvchining advokati Stefan Vaterkampning aytishicha, mijozi ayblovning mohiyati to‘g‘risida hech qanday bayonot bermaydi, lekin 8-oktabr kuni bo‘lib o‘tadigan sud majlisida u natsistlarga xizmat qilishga majburlagan shaxsiy sharoitlari haqida gapirib beradi.
Yozef S. ustidan sud jarayoni 2022-yilning yanvarigacha davom etadi. Sud majlisi davomida u ozodlikda qoladi va agar aybdor deb topilsa ham, qamoqqa olinmasligi mumkin: 16-noyabrda Yozef S. 101 yoshga to‘ladi.
Yozef S. — natsistlarga yordam berganlikda ayblanib sudlangan eng keksa odam. Zaksenxauzen lageri 1936-yilda tashkil etilgan. Lagerda jami 100 ming kishi halok bo‘lgan yoki o‘ldirilgan.
Izoh (0)