AQSh harbiy-dengiz kuchlarining USS Connecticut yadroviy suvosti kemasi oktabr oyi boshida noma’lum obyekt bilan to‘qnashgan. Bu haqda Navy Times nashriga tayanib, Meduza xabar berdi.
Voqea Hind—Tinch okeani mintaqasida sodir bo‘lgan. To‘qnashuvdan keyin suvosti kemasi yuzaga chiqishga majbur bo‘lgan va suv ustida Guam orolidagi bazaga yo‘l olgan.
Suvosti kemasi aynan nima bilan to‘qnashgani tekshiruv natijasida ma’lum bo‘ladi. Shu bilan birga, AQSh harbiy-dengiz qo‘mondonligidagi manbalarga ko‘ra, bu birorta kema yoki boshqa suvosti kemasi bo‘lgani ehtimoldan yiroq.
Kemaning bir nechta ekipaj a’zolari yengil tan jarohat olgan. Harbiy-dengiz kuchlari qo‘mondonligi kemaning yadro quvvatiga ega qurilma va ichki qismiga zarar yetmaganini aytdi.
Avgust oyida AQSh Buyuk Britaniya, Yaponiya va Avstraliya bilan Janubiy Xitoy dengizida qo‘shma mashg‘ulotlarni boshlagandi. Bunga javoban XXR xuddi shunday mashg‘ulotlar o‘tkazdi. Oktabr oyi boshida Xitoy Tayvan qirg‘oqlariga 38 ta jangovar samolyot yubordi, bu tan olinmagan respublikaning havo maydoniga kiritilgan eng ko‘p jangovar samolyot edi.
Avvalroq The Wall Street Journal amerikalik rasmiylarga tayanib, AQSh Tayvanda maxsus kuchlar va dengiz piyodalari ishtirokida bir yildan buyon yashirincha mashg‘ulotlar o‘tkazayotgani haqida xabar bergan. AQSh harbiylari “Xitoy tajovuzi” yuz bergan taqdirda unga qarshi mahalliy harbiy xizmatchilarni tayyorlamoqda.
Izoh (0)