Germaniyada 96 yoshli ayol Ikkinchi jahon urushi yillarida Polsha konslagerida saqlangan 11 300 mahbusning o‘ldirilishiga aloqadorlikda ayblanib sud qilinadi. Bu haqda Itsexo shahar prokuraturasining ayblov xulosasiga asoslanib, Welt nashri xabar berdi.
Foto: “RIA Novosti”
Nashrning yozishicha, ayol 18 yoshidan boshlab 1943-yil iyundan 1945-yil aprelgacha Polshadagi Shtuttgof konslageri komandirining kotibasi bo‘lib ishlagan. Gumon qilinayotgan jinoyatlar paytida u 21 yoshga to‘lmagani sababli ayol Itsexo viloyati voyaga yetmaganlar sudiga yuboriladi.
Ayolga qarshi ochilgan jinoiy ishda 11 387 ta qotillik qayd etilgan bo‘lib, jabrlanganlarning yettitasi tirik qolgan. Sud jarayoni 30-sentabrda boshlanadi.
Daily Mail nashrining yozishicha, ayolning ismi Irmgard Fuxner. U Gamburg yaqinida joylashgan Kvikborn shahridagi qariyalar uyida yashaydi. Fuxnerning da’vo qilishicha, u lagerda odamlar gaz bilan o‘ldirilayotganidan bexabar bo‘lgan.
Fevral oyida AQSh hukumati Ikkinchi Jahon urushi paytida Noyengamme fashistlar konslagerining “filiallari”dan birida qorovul bo‘lib xizmat qilgan 95 yoshli Fridrix Bergerni Germaniyaga surgun qilgandi.
Spiegel nashrining yozishicha, Berger Germaniyaga kelganidan keyin aeroportdayoq so‘roq qilingan. Unga nisbatan qotilliklarga sheriklik aybi bilan jinoiy ish ochilgan, ammo keyinchalik ish yopilgan. Nashrning ta’kidlashicha, erkakning yoshi va sog‘lig‘ini hisobga olgan holda, sud o‘tkazish ehtimoli juda past bo‘lgan.
