Германияда нацистлар концлагерининг 100 ёшли собиқ қўриқчиси устидан суд бошланди. У 3,5 минг кишини ўлдирганликда айбланмоқда

Германияда Заксенхаузен концлагерининг собиқ қўриқчиси, 100 ёшли Йозеф С. устидан суд бошланди.

Йозеф С. Иккинчи жаҳон уруши пайтида лагердаги 3 518  маҳбуснинг ўлдирилишида иштирок этганликда айбланмоқда. Прокуратура маълумотларига кўра, у совет ҳарбий асирларини шахсан отиб ташлаган ва одамларни мажбурлаб газ камераларига юборган.

Суд жараёни Бранденбург-Гёрден қамоқхонаси гимназиясида хавфсизлик чоралари кучайтирилган ҳолда ўтказилмоқда. Йозеф С. тингловга ногиронлар аравачасида, қўлида портфел билан олиб келинди.

Йозеф С. 1942 йилда Заксенхаузен концлагерида хизмат қила бошлаганида 21 ёшда бўлган. 1936—1945 йиллар орасида лагер 200 мингдан зиёд одамни, шу жумладан, яҳудийларни, лўлиларни, режимга қарши бўлганларни ўз ичига олган.

Айбланувчи ҳақида кам нарса маълум. Bild нашрининг ёзишича, у 1947 йилда асирликдан озод қилинган ва ўша пайтда Шарқий Германия ҳудудига кирган Бранденбургда чилангар бўлиб ишлаган. Нацистлар жиноятларини тергов қилиш марказий бўлинмаси унинг ишини 2019 йил апрелида Бранденбург маъмуриятига топширди ва унга қарши шу йилнинг 26 январида айблов эълон қилинди.

Йозеф С.нинг ёшига қарамай, тиббий кўрик уни кунига 2,5 соат мобайнида жараёнда иштирок эта олади деб тасдиқлади. Айбланувчининг адвокати Стефан Ватеркампнинг айтишича, мижози айбловнинг моҳияти тўғрисида ҳеч қандай баёнот бермайди, лекин 8 октябрь куни бўлиб ўтадиган суд мажлисида у нацистларга хизмат қилишга мажбурлаган шахсий шароитлари ҳақида гапириб беради.

Йозеф С. устидан суд жараёни 2022 йилнинг январигача давом этади. Суд мажлиси давомида у озодликда қолади ва агар айбдор деб топилса ҳам, қамоққа олинмаслиги мумкин: 16 ноябрда Йозеф С. 101 ёшга тўлади.

Йозеф С. — нацистларга ёрдам берганликда айбланиб судланган энг кекса одам. Заксенхаузен лагери 1936 йилда ташкил этилган. Лагерда жами 100 минг киши ҳалок бўлган ёки ўлдирилган.