AQShning Texas shtati Ostin shahridagi okrug sudi federal sudyasi Robert Pitman shtatda abortga qarshi yangi qonunning amal qilishini vaqtincha to‘xtatdi. Bu haqda The New York Times xabar berdi.
Shu tariqa sudya ushbu qonun tufayli Texas shtatiga qarshi da’vo arizasi bergan AQSh Adliya vazirligining talabini qondirdi. Sudya Pitmanning aytishicha, qonun kuchga kirgandan so‘ng “ayollar uchun o‘z hayotini nazorat qilish bo‘yicha Konstitutsiya bilan himoyalangan usullar noqonuniy tarzda taqiqlab qo‘yilgan”.
Texasda abortga qarshi qonun sentabr boshida kuchga kirgandi. Qonun homilada yurak urishi aniqlangandan keyin homiladorlikni to‘xtatishni taqiqlaydi. Bu, taxminan, oltinchi haftada sodir bo‘ladi, shifokorlar va huquq himoyachilarining so‘zlariga ko‘ra, bu davrda ko‘pchilik ayollar homilador ekanidan hali bexabar bo‘ladi.
Qonun AQShning har qanday fuqarosiga abort qilgan yoki bunga yordam bergan shaxsni sudga berishga ruxsat beradi. Agar sudlanuvchining aybi isbotlansa, da’vogar 10 ming dollar oladi. Bu esa qonunga rioya etilishi ustidan nazoratni mansabdor shaxslardan oddiy fuqarolarga o‘tkazadi va shu sababli qonunga e’tiroz bildirish qiyin.
Sudya Pitmanning qarori Texasda abortni tiklashga yordam beradimi yoki yo‘q, noma’lum: qonunda agar keyinchalik taqiq bekor qilingan taqdirda, qonunning o‘zi sud tomonidan taqiqlangan davrda ham abort qilish bo‘yicha da’vo qo‘zg‘atishga ruxsat berilishi aytilgan.
Ba’zi klinikalar abortni “iloji boricha tezroq” davom ettirishlarini ma’lum qilgan, lekin vaqt jadvaliga aniqlik kiritmagan.
Texas shtati Pitmanning qaroriga yuqori sudda — AQShning beshinchi okrug apellyatsiya sudida e’tiroz bildirishini e’lon qildi. Bu mamlakatning eng konservativ apellyatsiya sudlaridan biri hisoblanadi, u ilgari Texasda abortga qarshi qonunni to‘xtatish haqidagi klinikalarning da’vosini rad etgan, deb yozadi CNN.
Izoh (0)