АҚШнинг Техас штати Остин шаҳридаги округ суди федерал судьяси Роберт Питман штатда абортга қарши янги қонуннинг амал қилишини вақтинча тўхтатди. Бу ҳақда The New York Times хабар берди.
Шу тариқа судья ушбу қонун туфайли Техас штатига қарши даъво аризаси берган АҚШ Адлия вазирлигининг талабини қондирди. Судья Питманнинг айтишича, қонун кучга киргандан сўнг «аёллар учун ўз ҳаётини назорат қилиш бўйича Конституция билан ҳимояланган усуллар ноқонуний тарзда тақиқлаб қўйилган».
Техасда абортга қарши қонун сентябрь бошида кучга кирганди. Қонун ҳомилада юрак уриши аниқлангандан кейин ҳомиладорликни тўхтатишни тақиқлайди. Бу, тахминан, олтинчи ҳафтада содир бўлади, шифокорлар ва ҳуқуқ ҳимоячиларининг сўзларига кўра, бу даврда кўпчилик аёллар ҳомиладор эканидан ҳали бехабар бўлади.
Қонун АҚШнинг ҳар қандай фуқаросига аборт қилган ёки бунга ёрдам берган шахсни судга беришга рухсат беради. Агар судланувчининг айби исботланса, даъвогар 10 минг доллар олади. Бу эса қонунга риоя этилиши устидан назоратни мансабдор шахслардан оддий фуқароларга ўтказади ва шу сабабли қонунга эътироз билдириш қийин.
Судья Питманнинг қарори Техасда абортни тиклашга ёрдам берадими ёки йўқ, номаълум: қонунда агар кейинчалик тақиқ бекор қилинган тақдирда, қонуннинг ўзи суд томонидан тақиқланган даврда ҳам аборт қилиш бўйича даъво қўзғатишга рухсат берилиши айтилган.
Баъзи клиникалар абортни «иложи борича тезроқ» давом эттиришларини маълум қилган, лекин вақт жадвалига аниқлик киритмаган.
Техас штати Питманнинг қарорига юқори судда — АҚШнинг бешинчи округ апелляция судида эътироз билдиришини эълон қилди. Бу мамлакатнинг энг консерватив апелляция судларидан бири ҳисобланади, у илгари Техасда абортга қарши қонунни тўхтатиш ҳақидаги клиникаларнинг даъвосини рад этган, деб ёзади CNN.
Изоҳ (0)