Malika Diananing Londondagi sobiq uyi rasmiy sayyohlik markaziga aylantirildi. Bu haqda “Angliya merosi” saytida xabar berilgan.
Diana Spenser Uels malikasi bo‘lishidan avval yashagan kvartira rasmiy ko‘k yodgorlik nishoni bilan belgilab qo‘yildi. Nishonda shunday deb yozilgan: “Bu yerda 1979—1981-yillarda keyinchalik Uels malikasiga aylangan ledi Diana Spenser istiqomat qilgan”. Uy manzilini xaritada ham ko‘rish mumkin.
“Diana londonliklar qalbida alohida o‘rin tutgan va hozir ham shunday joyni egallab turibdi, biz uning faoliyatini boshqalarga rasman eslatib turuvchi ko‘k nishon o‘rnatilganidan juda mamnunmiz”, — dedi London Assambleyasi rahbari Endryu Boff.
Ma’lum bo‘lishicha, Diana bu kvartirani buvisidan meros qolgan pul evaziga — 50 ming funtga (67 ming dollar) sotib olgan. O‘sha paytda Londonga ko‘chib kelgan 18 yoshli bo‘lajak malika bolalar bog‘chasida tarbiyachilik qilardi. Keyinchalik, 1980-yilda u Britaniya taxtining vorisi shahzoda Charlz bilan uchrasha boshladi, bir yildan keyin ular turmush qurdi.
Diananing ommaviy maqomi oshgani sayin, uy bo‘lajak malikani suratga olish ilinjidagi muxbirlar tomonidan muntazam kuzatuvda bo‘lardi. Diana shahzoda Charlz bilan unashtirilgandan so‘ng onasi kvartirani sotdi. Bugungi kunda xonadon haligacha xususiy.
Angliyada ko‘k yodgorlik nishonlari bir qator siyosatchilar, rassomlar, yozuvchilar va boshqa muhim tarixiy shaxslarga, masalan, yozuvchi Virjiniya Vulf, bosh vazir Uinston Cherchill va Queen vokalchisi Freddi Merkyuriy sharafiga o‘natilgan. Bunday belgilari bor joylar mashhur sayyohlik obyektlariga aylanmoqda.
Nishonni olish uchun taniqli shaxslar britaniyalik bo‘lishi shart emas. Shuningdek, u Britaniyada yashagan chet elliklar, masalan, hind siyosatchisi Mahatma Gandi va fransuz yozuvchisi Emil Zola sharafiga ham o‘rnatilgan. Birgina Londonda 950 ga yaqin ko‘k nishon bor.
Izoh (0)