Gruziya sobiq prezidenti Mixail Saakashvili hibsga olindi. Bu haqda mamlakat bosh vaziri Irakliy Garibashvili ma’lum qildi, deb xabar berdi Gruziyaning “Perviy kanal” telekanali.
Garibashvilining so‘zlariga ko‘ra, Saakashvili ayni vaqtda Gruziyadagi penitensiar muassasalardan birida hibsda saqlanmoqda.
“Huquqni muhofaza qiluvchi organlarga uning Ukrainadan Gruziyaga o‘tayotgani haqida birlamchi axborot kelib tushgan va ushbu jarayon ular tomonidan to‘liq nazorat ostiga olingan”, — degan Garibashvili.
Bosh vazir Gruziya maxsus xizmati vakillari Saakashvilini hibsga olish uchun juda qulay va xalaqit qiladigan jihatlar nihoyatda kam bo‘lgan pallani poylagani haqida gapirgan, deb yozmoqda “Novosti Gruzii” nashri.
Saakashvili Tbilisi yaqinidagi Rustavskoy qamog‘ida saqlanmoqda, deya xabar qilgan “Sputnik Gruziya”.
Hibsga olinishidan avval Saakashvilining o‘zi ijtimoiy tarmoqlarda video e’lon qilgan va unda “Tbilisida meni hibsga olishlari mumkin, lekin men hech narsadan qo‘rqayman”, — deb gapirgan.
Shuningdek, videoda u mamlakatga odamlarga yordam berish uchun qaytganini aytgan hamda Gruziyada 2-oktabrda boshlanadigan munitsipial saylovlarda ishtirok etishga chaqirgan.
Mixail Saakashvili 2008—2013-yillarda Gruziya prezidenti bo‘lgan. U prezidentlik muddati tugashiga oz qolgan vaqtda mamlakatdan chiqib ketgan. Shundan keyin unga nisbatan to‘rtta jinoiy ish ochilgan, ikkisi bo‘yicha 2018-yilda sud hukmi ham o‘qilgan.
Sentabr oxirida Saakashvili Gruziyaga qaytishni va’da qilgandi. 1-oktabr kuni u mamlakatga kelganini bildirdi. Saakashvilini hibsga olishni va’da bergan Gruziya hukumati sobiq prezidentning mamlakatga qaytganini rasman tasdiqlamagandi.
Izoh (0)