Belarus prezidenti Aleksandr Lukashenko CNN telekanaliga bergan intervyusida belaruslik muxolifat vakili Svetlana Tixanovskayani muhokama qilishdan bosh tortdi, deb yozadi “TASS”.
“Bu shuni anglatadiki, men ayol kishining tabiati haqida gapirmayman. Men ayollar bilan tortishmayman va unga baho berishni istamayman”, — dedi Lukashenko CNN muxbir Metyu Chensga.
Prezidentning ta’kidlashicha, muxolifat yetakchisi — bu “ma’lum bir mamlakatda yashaydigan va boshqacha nuqtayi nazarga ega shaxs”.
“Men Belarusdagi bunday odamlarni (muxolifatchilar) bilaman. Ular siz tomonda va sizdan pul olishadi”, — dedi Lukashenko amerikalik jurnalistga.
Belarusda 2020-yil 9-avgustda prezident saylovlari bo‘lib o‘tdi, Markaziy saylov komissiyasi rasmiy ma’lumotlariga ko‘ra, unda amaldagi prezident Aleksandr Lukashenko g‘alaba qozongan. Ikkinchi o‘rinni muxolifatchi Svetlana Tixanovskaya egalladi. U saylov natijalarini tan olmadi va mamlakatni tark etdi. Ovoz berish natijalari e’lon qilingandan so‘ng respublikada ommaviy norozilik namoyishlari boshlandi, bu esa dastlabki kunlarda huquqni muhofaza qilish organlari xodimlari bilan to‘qnashuvlarga olib keldi.
Iyun oyida Chexiya parlamenti Senati Svetlana Tixanovskayani Belarus prezidenti deb tan oldi.
Izoh (0)