Малика Диананинг Лондондаги собиқ уйи сайёҳлик марказига айлантирилди

Малика Диананинг Лондондаги собиқ уйи расмий сайёҳлик марказига айлантирилди. Бу ҳақда «Англия мероси» сайтида хабар берилган.

Диана Спенсер Уэльс маликаси бўлишидан аввал яшаган квартира расмий кўк ёдгорлик нишони билан белгилаб қўйилди. Нишонда шундай деб ёзилган: «Бу ерда 1979—1981 йилларда кейинчалик Уэльс маликасига айланган леди Диана Спенсер истиқомат қилган». Уй манзилини харитада ҳам кўриш мумкин.

«Диана лондонликлар қалбида алоҳида ўрин тутган ва ҳозир ҳам шундай жойни эгаллаб турибди, биз унинг фаолиятини бошқаларга расман эслатиб турувчи кўк нишон ўрнатилганидан жуда мамнунмиз», — деди Лондон Ассамблеяси раҳбари Эндрю Бофф.

Маълум бўлишича, Диана бу квартирани бувисидан мерос қолган пул эвазига — 50 минг фунтга (67 минг доллар) сотиб олган. Ўша пайтда Лондонга кўчиб келган 18 ёшли бўлажак малика болалар боғчасида тарбиячилик қиларди. Кейинчалик, 1980 йилда у Британия тахтининг вориси шаҳзода Чарльз билан учраша бошлади, бир йилдан кейин улар турмуш қурди.

Диананинг оммавий мақоми ошгани сайин, уй бўлажак маликани суратга олиш илинжидаги мухбирлар томонидан мунтазам кузатувда бўларди. Диана шаҳзода Чарльз билан унаштирилгандан сўнг онаси квартирани сотди. Бугунги кунда хонадон ҳалигача хусусий.

Англияда кўк ёдгорлик нишонлари бир қатор сиёсатчилар, рассомлар, ёзувчилар ва бошқа муҳим тарихий шахсларга, масалан, ёзувчи Виржиния Вульф, бош вазир Уинстон Черчилль ва Queen вокалчиси Фредди Меркьюрий шарафига ўнатилган. Бундай белгилари бор жойлар машҳур сайёҳлик объектларига айланмоқда.

Нишонни олиш учун таниқли шахслар британиялик бўлиши шарт эмас. Шунингдек, у Британияда яшаган чет элликлар, масалан, ҳинд сиёсатчиси Маҳатма Ганди ва француз ёзувчиси Эмиль Зола шарафига ҳам ўрнатилган. Биргина Лондонда 950 га яқин кўк нишон бор.