Gruziyaning sobiq prezidenti Mixail Saakashvili ijtimoiy tarmoqlarda mamlakatga qaytib kelgani haqida yozdi.
“Xayrli tong, Gruziya, sakkiz yildan keyin yana Gruziyadan salom”, — deya Saakashvilining xabarini keltirgan Gruziya matbuoti.
O‘z navbatida, Gruziya Ichki ishlar vazirligi jurnalistlarga Saakashvilining Gruziya hududida ekani haqida hech qanday ma’lumotga ega emasligini bildirdi.
Avvalroq sobiq prezident ijtimoiy tarmoqlarda Gruziyaga Kiyev-Tbilisi reysi bilan 2-oktabr kuni kechqurun, mahalliy saylovlarda ovoz berish tugagach yetib kelish niyatidaligini yozgan.
Shu bilan birga, hukumat vakillari Saakashvilini uni qamoqxonaga kuzatib qo‘yish uchun kutishayotganini aytgan. Gruziya prokuraturasi Saakashvilini bir nechta jinoiy moddalar bilan ayblamoqda, ulardan ikkitasi bo‘yicha sobiq prezident jazoga hukm qilingan.
Fevral oxirida Mixail Saakashvili Gruziya muxolifatini noroziliklarni to‘xtatmaslikka chaqirgani haqida xabar berilgandi, U, shuningdek, Tbilisida “Yagona milliy harakat” muxolif partiya raisi Nikanor Meliyaning hibsga olinishini qoralagan. Saakashvilining aytishicha, uni qo‘lga olganlarning o‘zlari “juda uzoq vaqt qamoqda o‘tiradi”.
Eslatib o‘tamiz, Gruziya politsiyasi 23-fevral kuni “Yagona milliy harakat” (YaMH) muxolifat partiyasi yetakchisi Nikanor Meliyani hibsga olgandi. U 2019-yilda tartibsizliklar uyushtirganlikda va Gruziya parlamentiga qilingan hujumda ishtirok etganlikda ayblanmoqda.
Gruziyadagi “Yagona milliy harakat” partiyasi gruziyalik siyosat arbobi Mixail Saakashvili tomonidan tashkil etilgan. U partiyani boshqarish davomida hokimiyatga egalik qilib kelgan, ammo 2012-yilgi parlament saylovlarida partiya biznesmen Bidzina Ivanishvili tomonidan asos solingan “Gruziya orzusi” ittifoqiga yutqazgan.
Izoh (0)