Gruziya sobiq prezidenti Mixail Saakashvili o‘zining Batumida ekani haqidagi bayonotlariga qaramay, mamlakatda emas. Bu haqda hukmron “Gruziya orzusi” partiyasi raisi Irakliy Kobaxidzega tayanib, “Interfaks” xabar berdi.
“Men qat’iy aytaman, Saakashvili Gruziyada emas. U fonida Batumi ko‘ringan video kadrlarni montaj qilgan”, — dedi Kobaxidze jurnalistlarga.
Uning ta’kidlashicha, Saakashvili tarqatgan videotasvirlar, birinchi navbatda, “o‘z partiyasida yetakchilikni qo‘lga kiritishga” qaratilgan. “Bilamizki, ‘Yagona milliy harakat’ partiyasida ichki qarama-qarshilik mavjud, Saakashvili esa o‘zini shu yerda qilib ko‘rsatish bilan muxolifatning asosiy yetakchisi ekanini isbotlashga qaror qilgan”, — dedi Kobaxidze.
Saakashvalining Gruziyada ekanini mamlakat Ichki ishlar vazirligi ham rad etdi. “Saakashvili davlat chegarasini kesib o‘tmagan”, — deyiladi IIV matbuot xizmati xabarida.
Gruziyada qidiruvda bo‘lgan sobiq prezident Mixail Saakashvili ijtimoiy tarmoqlarda vataniga kelgani haqida xabar qoldirgandi. Keyinroq 2 ta videomurojaat tarqatib, unda Gruziyaning Batumi shahrida ekanini aytgan.
U o‘z bayonotida muxolifatning barcha tarafdorlarini 2-oktabr kuni bo‘lib o‘tadigan mahalliy saylovlardan so‘ng butun Gruziya hududlaridan poytaxt Tbilisigacha yurishga chaqirgan.
Avvalroq sobiq prezident ijtimoiy tarmoqlarda Gruziyaga Kiyev-Tbilisi reysi bilan 2-oktabr kuni kechqurun, mahalliy saylovlarda ovoz berish tugagach yetib kelish niyatidaligini yozgan.
Saakashvili Gruziyada ichki qidiruvga berilgan va bir nechta jinoiy ishlar bo‘yicha tergov qilinmoqda. Gruziya rasmiy vakillari Saakashvali chegarani kesib o‘tishi bilan hibsga olinishini bir necha bor ta’kidlagan.
Izoh (0)