Ruminiyaning Konstansa shahrida koronavirusga chalinganlar uchun mo‘ljallangan yuqumli kasalliklar shifoxonasi yonib ketdi. Oqibatda, kamida 9 kishi halok bo‘lgan, deb yozadi Associates Press (AP) mahalliy hukumatga tayanib.
Yong‘in reanimatsiya bo‘limida paydo bo‘lgan. Hodisa sabablari hozircha noma’lum. Mamlakat Sog‘liqni saqlash vazirligi batafsil ma’lumot keyinroq matbuot anjumanida taqdim etilishini ta’kidladi.
Qayd etilishicha, kasalxonada 113 nafar bemor davolanayotgandi, ulardan 10 nafari reanimatsiya bo‘limida bo‘lgan. Bemorlarning bir nechtasini deraza orqali evakuatsiya qilishga to‘g‘ri kelgan.
Sentabr boshida Shimoliy Makedoniyaning Tetovo shahrida COVID-19 bemorlari davolanayotgan kasalxonada yong‘in chiqqandi. Hodisa oqibatida kamida 10 kishi halok bo‘lgan.
Iyul oyida esa Iroqning Nasiriya shahridagi COVID-kasalxonada yong‘in sodir bo‘lgandi. Hodisa qurbonlarining soni 77 kishiga yetgan, 20 kishi evakuatsiya natijasida qutqarib qolingan.
Shuningdek, 24-aprel kuni Iroqning Bag‘dod shahrida joylashgan Ibn al-Xatib kasalxonasida yong‘in sodir bo‘lgandi. Kasalxonada yong‘indan himoya tizimi bo‘lmagan. Dastlabki ma’lumotlarga ko‘ra, yong‘in boshlanishiga kislorod ballonining portlashi sabab bo‘lgan. So‘nggi ma’lumotlar bo‘yicha 88 kishi halok bo‘lgan, 100 dan ortig‘i jarohat olgan. Qurbonlarning kamida 28 nafari sun’iy nafas oldirish apparatlariga ulangan bemorlar bo‘lgan.
O‘sha yong‘indan keyin Iroqda uch kunlik motam e’lon qilingandi. Iroq sog‘liqni saqlash vaziri va Bag‘dod gubernatori ishdan bo‘shatilgan.
Izoh (0)