Andijon viloyatida 2021-yilning o‘tgan sakkiz oyi davomida 313 mingdan ortiq fuqaro xorijga chiqish uchun “zagranpasport” olgan. Bu haqda viloyat ichki ishlar boshqarmasi migratsiya va fuqarolikni rasmiylashtirish boshqarmasi tomonidan o‘tkazilgan matbuot anjumanida ma’lum qilindi, deya xabar bermoqda “Daryo” muxbiri.
Ma’lum qilinishicha, Prezidentning 2017-yil 16-avgustdagi farmoniga asosan 2019-yilning 1-yanvaridan xorijga chiqish uchun ruxsat yozuvi stikerini rasmiylashtirish tartibi bekor qilinib, xorijga chiqish uchun biometrik pasportlar berish (xorijga chiqish pasporti) joriy etilgan. Farmonga ko‘ra, fuqarolar 2021-yilning 1-yanvaridan boshlab, xorijga chiqish biometrik pasporti (qizil pasport) bilan O‘zbekiston hududidan chiqishlari mumkinligi belgilangan.
“‘Zagranpasport’larni berish 2019-yildan boshlangan bo‘lib, dastlab viloyat migratsiya va fuqarolikni rasmiylashtirish boshqarmasida yo‘lga qo‘yilgan. Ikki yil davomida farmon ijrosi doirasida barcha shahar va tumanlar kerakli texnika hamda jihozlar bilan ta’minlanib, hududlarda ham berish boshlangan. 2019-yilda jami 99 ming 112 nafar, 2020-yilda 76 ming 721 nafar fuqaro ‘zagranpasport’ olish uchun murojaat qilgan. Murojaatlarning 99 foizi ijobiy hal etilgan. 2021-yilning sakkiz oyi davomida xorijga chiqish masalasida murojaat qilgan jami 313 ming 152 nafar fuqarolar uchun xorijga chiqish biometrik pasporti rasmiylashtirib berildi. Shundan 14 ming 632 nafarini 16 yoshga to‘lmagan fuqarolar tashkil etadi”, — deydi viloyat IIB Migratsiya va fuqarolikni rasmiylashtirish boshqarmasi boshlig‘i vazifasini bajaruvchi, podpolkovnik Jahongir Ismoilov.
Izoh (0)