“Nahotki 319 ming abituriyent shuni ham eplay olmagan?”. O‘zbekistonda abituriyentlarning qariyb 36 foizi o‘tish balini to‘play olmagani ma’lum bo‘ldi

O‘zbekiston oliy ta’lim muassasalariga kirish imtihonlari natijalariga ko‘ra, abituriyentlarning 35,8 foizi o‘tish balini to‘play olmagan. Bu haqda Xushnudbek Xudoyberdiyev ma’lum qildi.

Davlat test markazi ma’lumotlariga ko‘ra, 2021-yil deyarli 893 ming abituriyent test sinovlarida ishtirok etdi. Ulardan 319 ming nafari o‘tish balining eng quyi chegarasi bo‘lgan 56,7 balni to‘play olmagan.

Hududlar sharoitida imtihonlardan muvaffaqiyatsiz bo‘lganlarning aksariyati Qashqadaryo (39,4 ming), Samarqand (35 ming) va Toshkent (34,1 ming) viloyatlarida qayd etilgan. Sirdaryo viloyati eng yaxshi natijaga ega — 12 ming.

“56,7 ball — bu to‘plash mumkin bo‘lgan eng yuqori 189 balning 30 foizi degani. Ya’ni abituriyent hech bo‘lmasa 30 foiz bilimga ega bo‘lsa, ushbu ko‘rsatkichni to‘play oladi. 30 foiz bilim esa reyting tizimidan qiyos olsak, hatto 2 baho ham emas! 1 baho desak to‘g‘ri bo‘lar, balki”, — deb yozadi Xushnudbek Xudoyberdiyev.

U 56,7 ball to‘plash uchun qancha to‘g‘ri javobni ko‘rsatish kerakligini ma’lum qildi. Unga ko‘ra, majburiy blokdagi 10 ta savoldan 5 tasiga, mutaxassislik blokidagi 20 ta savoldan 4 tasiga javob berish kerak.

“Majburiy blokdagi savollar o‘ta va o‘ta oson darajada bo‘lsa, mutaxassislik blokidagi savollarga esa hammasini bitta harf, masalan, A qilib belgilasa ham 4 tadan oshiq chiqsa, nahotki 319 ming abituriyentlar shuni ham eplay olmagan. Bu dahshat emasmi?

Yoshlarni gapirtirsa, darrov “ota-onam kambag‘al, sharoitimiz yo‘q, repetitorga pulimiz yetmaydi”, deb gap boshlaydi va aybni osongina otasiga to‘nkab qo‘ya qoladi. Vaholanki, hech bo‘lmasa 2 baho darajasida o‘qish uchun repetitorga borish shartmas. Ozgina qo‘liga kitob olsa, salgina ko‘nglida xohish bo‘lsa, yetarli edi” — deb yozadi bloger.