Toshkent viloyati hokimligi mulozimlari tadbirkorlik bilan shug‘ullanishi haqidagi xabarlarga munosabat bildirildi

Ijtimoiy tarmoqlarda Toshkent viloyati hokimligi mulozimlari biznesi haqida materiallar e’lon qilindi. Xabarlar yuzasidan viloyat hokimligi rasmiy munosabat bildirdi.

Xabarda aytilishicha, Toshkent viloyat hokimligida ishlaydigan bir qator yuqori lavozimli amaldorlar MChJlarda ta’sischi sifatida ishtirok etgan.

Vazirlar Mahkamasining 1992-yil 6-martdagi “Tadbirkorlik faoliyati bilan shug‘ullanish taqiqlangan mansabdor shaxslarning ro‘yxati to‘g‘risida”gi 103-son qaroriga asosan tadbirkorlik faoliyati bilan shug‘ullanishi taqiqlangan mansabdor shaxslar ro‘yxati belgilab berilgan.

Bundan tashqari, O‘zbekistonning “Tadbirkorlik faoliyati erkinligining kafolatlari to‘g‘risida”gi qonunning 3-moddasida tadbirkorlik faoliyati tushunchasiga tarif berilgan. Unga ko‘ra, tadbirkorlik faoliyati (tadbirkorlik) – tadbirkorlik faoliyati subyektlari tomonidan qonun hujjatlariga muvofiq amalga oshiriladigan, tavakkal qilib va o‘z mulkiy javobgarligi ostida daromad (foyda) olishga qaratilgan tashabbuskor faoliyat tushuniladi.

Bu bilan qonunda bevosita faoliyat bilan shug‘ullanish nazarda tutilmoqda. Bu qonun hujjatining qo‘llanilishi bo‘yicha O‘zbekiston adliya vaziri Ruslanbek Davletov 2021-yil 9-iyulda mahalliy nashrlarning biriga bergan intervyusida ham “Amaldagi qonunchilikka ko‘ra, davlat xizmatchilari yakka tartibda tadbirkorlik qila olmaydi xolos, lekin, masalan, MChJ ta’sischisi bo‘lishga haqli”, – degan.

“Bugungi kunda amalda bo‘lgan qonun hujjatlari bo‘yicha xabarlarda ro‘yxati keltirilgan MChJlar bilan Toshkent viloyat hokimligi o‘rtasida shartnomaviy munosabatlarga kirishilmagani yoki manfaatlar to‘qnashuvi holatlari yuzasidan harakatlar amalga oshirilmaganini ma’lum qilamiz”, – deyiladi hokimlik xabarida.

Bundan tashqari, hokimlikning ma’lum qilishicha, MChJlar tashkil etilgan vaqti bilan amaldorlarning lavozimga tayinlangan vaqtlari solishtirilganida ular lavozimga kelgunga qadar MChJlarga ta’sischi bo‘lib kirgani oydinlashadi. Xususan:

• “Relax Tour” MChJ 2018-yil 5-iyunda ro‘yxatdan o‘tgan bo‘lsa, Toshkent viloyati hokimligining turizm va sportni rivojlantirish masalalari bo‘yicha kotibiyat mudiri – Rahmatullayev Farrux Anvarovich 2018-yil 18-sentabrda tayinlangan va ushbu MChJ ochilganidan bugungi kunga qadar faoliyat yuritmayotgan korxonalar ro‘yxatida turadi;
• “Sadaf Diyor Savdo” MChJ 2016-yilda tashkil etilgan bo‘lib, Toshkent viloyati Moliya boshqarmasi boshlig‘i Xoliqulov Olimjon Ahmedovich 2020-yilda ushbu lavozimga tayinlangan bo‘lsa-da, bugungi kunga qadar Toshkent viloyat hokimligi bilan ushbu MChJ o‘rtasida shartnomaviy munosabatlar amalga oshirilmagan. Shuningdek, O. Xoliqulovning MChJ rahbarligi borasida esa o‘z faoliyatini qonun hujjatlariga muvofiqlashtirish to‘g‘risida qat’iy ko‘rsatma berilganligi ma’lum qilinadi;
• “Smart kadastr” MChJ 2020-yil ochilgan bo‘lsa, Kadastr agentligi Toshkent viloyati boshqarmasi boshlig‘i Ahrorov Jasur Davletboyevich 2021-yilda ushbu lavozimga tayinlangan bo‘lib, ushbu MChJga hisob raqami ham ochilmagan;
• “Osiyo oqshomi” 2015-yilda tashkil qilingan bo‘lib, Toshkent viloyati hokimining shaharlar infratuzilmasini rivojlantirish, obodonlashtirish va kommunal xo‘jalik masalalari bo‘yicha o‘rinbosari – Meliyev Barhayot Baxtiyorjonovich 2021-yilda ushbu lavozimga tayinlangan, MChJning bugungi kunga qadar bankda ham hisob raqami ochilmaganligi ma’lum qilinadi.
• “Asaxiy Films” 2019-yil tashkil etilgan bo‘lib, Toshkent viloyati hokimining matbuot kotibi, axborot siyosati masalalari bo‘yicha hokimning maslahatchisi Jumayev Hamza Hayotovich ushbu MChJ ta’sischisi hisoblanadi va amaldagi qonunchilikda bunga ruxsat bor. Hamza Jumayev 2021-yil mart oyida lavozimga tayinlangan bo‘lsa-da, bugungi kunga qadar Toshkent viloyat hokimligi bilan ushbu MChJ o‘rtasida shartnomaviy munosabatlar amalga oshirilmagan;
• “Darxon Agro Klast” 2018-yilda tashkil etilgan bo‘lib, Toshkent viloyati hokimligining qishloq va suv xo‘jaligi masalalari bo‘yicha kotibiyati mudiri Kadirov Furqat Qahramonovich – 2020-yil fevral oyida tayinlangan bo‘lsa, bugungi kunga qadar Toshkent viloyat hokimligi bilan ushbu MChJ o‘rtasida shartnomaviy munosabatlar amalga oshirilmagani, biroq ushbu kotibiyat mudiriga MChJ rahbarligi borasida o‘z faoliyatini amaldagi qonun hujjatlariga muvofiqlashtirish to‘g‘risida qat’iy ko‘rsatma berilgan.