Namanganda Tokioda bo‘lib o‘tgan Paralimpiya o‘yinlari g‘olib va sovrindorlari taqdirlandi. Bu haqda “Daryo” muxbiri Azizbek Abduvaliyev xabar bermoqda.
Mazkur o‘yinlarda Namangan vakillari munosib ishtirok etdi. Ular tomonidan ikkita oltin, bitta kumush va bitta bronza medali qo‘lga kiritildi.
Jumladan, Namangan shahri vakili Feruz Sayidov para dzyudo bo‘yicha 73 kilogramm vazn toifasida oltin medal sohibiga aylangan bo‘lsa, chustlik Nozimaxon Qayumovaga para yengil atletikaning nayza uloqtirish turida teng keladigan topilmadi.
Mingbuloqlik Nurxon Qurbonova nayza uloqtirishda kumush, yadro uloqtirish bo‘yicha esa bronza medaliga sazovor bo‘ldi. Qolaversa, jahon rekordini yangiladi.
Tadbirda viloyat hokimi Shavkat Abdurazzaqov hamda mahalla va oilani qo‘llab-quvvatlash vaziri o‘rinbosari Sodiqjon Turdiyev tomonidan g‘olib va sovrindor sportchilarga Gentra avtomobillari topshirildi.
Ma’lumot uchun, oldinroq Prezident farmoni bilan Feruz Sayidov “O‘zbekiston iftixori”, Nozima Qayumova va Nurxon Qurbonova esa “O‘zbekiston Respublikasida xizmat ko‘rsatgan sportchi” unvonlari bilan taqdirlangandi.
Avvalroq Paralimpiya o‘yinlari sovrindorlari bo‘lgan o‘zbekistonlik sportchilarga Prezident sovg‘asi sifatida avtomobil va Toshkent shahridan uylar topshirilgandi, Andijon viloyati hokimi Paralimpiya o‘yinlari oltin medali sovrindori Bobur Omonovga Andijon shahridan 2-xonali xonadon sovg‘a qilgan, Qashqadaryo viloyatida Paralimpiya o‘yinlarida viloyat sha’nini himoya qilgan Olimpiadaning kumush medali sovrindorlariga Gentra avtomobillari topshirilgandi, Samarqand hokimi esa Olimpiya va Paralimpiya o‘yinlari sovrindorlariga uy sovg‘a qilgandi.
Izoh (0)