2-sentabr kuni Toshkent vaqti bilan soat 07:30 da Niagara sharsharasi O‘zbekiston mustaqilligining 30 yilligi sharafiga mamlakat bayrog‘i ranglarida yoritildi.
Avvalroq AQSh va Kanadada yashovchi o‘zbekistonliklar ushbu tadbirni saytdagi anketani to‘ldirib, to‘g‘ridan to‘g‘ri tomosha qilishlari mumkinligi to‘g‘risida xabar berilgandi. Niagara sharsharasining O‘zbekiston bayrog‘i ranglari bilan yoritilishi 15 daqiqa davom etgan.
Ta’kidlash kerakki, O‘zbekiston mustaqilligining 30 yilligi munosabati bilan turli davlatlardagi dunyoga mashhur binolarda ham mamlakat bayrog‘i tasvirlandi. Xususan, Dubaydagi dunyodagi eng baland bino Burj Xalifa va Palmaning favvoralari O‘zbekiston bayrog‘i ranglari bilan yoritildi.
Atako‘le teleminorasi — Turkiya poytaxti Anqaraning eng uzun nuqtalaridan biri, shuningdek, poytaxtdagi egizak binolar va Istanbuldagi afsonaviy Fotih Sulton Mehmet ko‘prigi ham O‘zbekiston bayrog‘ining ranglariga burkandi.
Bundan tashqari, mashhur Petronas egizak minoralari maydoni, Kuala-Lumpur meriyasi binosi (Malayziyadagi eng katta LED-ekran) va Saloma Link piyodalar ko‘prigi O‘zbekiston bayrog‘i ranglarida yoritildi.
Nyu-Yorkdagi Tayms-skver ekranida ham O‘zbekiston bayrog‘ini tomosha qilish mumkin bo‘ldi.
Eslatib o‘tamiz, 2020-yilda O‘zbekiston mustaqilligining 29 yilligi munosabati bilan Birlashgan Arab Amirliklarining Dubay shahrida joylashgan dunyoning eng baland imorat Burj-Xalifada O‘zbekiston bayrog‘i 1-sentabr kuni 1 daqiqa davomida namoyish etilgandi.
Izoh (0)