Ijtimoiy tarmoqda “GAI to‘xtatgan opani jag‘lari baquvvat ekan” sarlavhasi ostida video tarqaldi. Unda Matiz haydovchisi bo‘lgan ayolni YPX xodimlari to‘xtatib turgani, ayol muloqot chog‘ida ularni haqorat qilganini ko‘rish mumkin. YHXBB matbuot xizmati tarqalgan video yuzasidan ma’lumot berdi.
Ma’lum qilinishicha, 30-avgust kuni soat 02:00 larda Toshkent shahar, Shayxontohur tumani hududida joylashgan “Ibn Sino” dehqon bozori yaqinida tungi xizmatda bo‘lgan YPX xodimi ko‘rinishidan mastlik alomati sezilgan, xatti-harakatlari shubhali bo‘lgan ayol kishi Matiz’ni boshqarmoqchi bo‘lganligiga e’tibor qaratgan.
Boshqaruvida bo‘lgan Lacetti xizmat avtomobilini yo‘l chetiga to‘xtatib, ushbu ayol kishi bilan muloqot qilgan. Muloqot davomida fuqaro D.T.ni mastlik holatida gumonlagan va transport vositasini boshqarmoqchi bo‘lgan vaqtda xodim ko‘ngilsiz hodisa sodir bo‘lishini inobatga olib, boshqarishiga yo‘l qo‘ymagan.
Shundan so‘ng fuqaro D.T. turli so‘zlar bilan xodimni haqorat qilgan. Xodim vazminlik bilan oila a’zosi yoki tanishi kelib olib ketmaguncha avtomobilni boshqarishiga yo‘l qo‘ymasligini ma’lum qilgan. Fuqaro farzandini chaqirgandan so‘ng xodim o‘z xizmatini davom ettirgan.
“Fuqaro D.T. jamoat joyida yurish-turish qoidalarini buzganligi, YPX xodimini turli so‘zlar bilan haqorat qilganligi bo‘yicha tegishli hujjatlar to‘planib, o‘rganib chiqishlik uchun jinoyat ishlari bo‘yicha Shayxontohur tumani sudiga yuborish choralari ko‘rilmoqda. Shuningdek, videolavha ijtimoiy tarmoqda tarqalib ketishi holati o‘rganilmoqda”, — deyiladi YHXBB xabarida.
Izoh (0)