Namanganda IIBning qayta tashkil etilgan “Mehnat va shuhrat” muzeyi faoliyatini boshladi. Bu haqda “Daryo” muxbiri Azizbek Abduvaliyev xabar bermoqda.
Mazkur muzey rahbari Furqat Mahmudovning aytishicha, bu dargoh aslida 2002-yili viloyat IIBning o‘sha paytdagi boshlig‘i Tohir Mullajonov buyrug‘i bilan tashkil etilgan. Biroq o‘tgan qariyb 20 yil davomida moslashmagan, tor va qorong‘i xonalarda faoliyat yuritib kelgan.
2021-yil may oyida muzey uchun keng, yorug‘ va shinam alohida zal ajratib berildi hamda muassasa o‘zining “ikkinchi umrini” boshladi.
“Muzeyimiz sohibqiron Amir Temur davridan to hozirgacha bo‘lgan muddatni o‘z ichiga oladi. Qadim paytlardagi mirshablar, harbiylar kiygan kiyimlar, qurol-aslahalarni qidirib topdik. Bayroqlar, pogonlar, orden-medallarni to‘pladik. Turli yillarda ichki ishlar vaziri, viloyat IIB boshlig‘i bo‘lgan rahbarlarning fotolari, ular haqidagi ma’lumotlar jamlandi. Shuningdek, ichki ishlar tizimidagi faoliyati davomida halok bo‘lgan marhum hamkasblarimiz xotirasi ham yodga olingan”, — deydi Furqat Mahmudov.
Muzeyning katta qismi boshqarma tarkibidagi bo‘linmalarning tarixi va bugungi kuniga bag‘ishlangan. Jumladan, Jinoyat qidiruv boshqarmasiga oid stendda mitti fotoapparat, diktofon va kameralarni, yo‘l harakati xavfsizligi boshqarmasiga oid stendda esa o‘sha paytlarda asosiy harakat vositasi bo‘lgan mototsikldan tortib jezl va tezlik o‘lchagichlargacha bor.
“Eksponatlar orasida noyob va tarixiy qimmatga ega bo‘lganlari ko‘p. Aytaylik, terrorchilardan olingan ashyoviy dalillar, xususan, qo‘lbola qurollar. Umuman olganda, qurollarning salmoqli kolleksiyasini to‘plashga muvaffaq bo‘ldik. Ular orasida 1891-yilga oid salkam bir metrli karabindan tortib, kaftdek keladigan mitti to‘pponcha, hatto pulemyotgacha bor”, — deydi muzey rahbari.
Ushbu muzey kelgusida yangi eksponatlar bilan boyishi, bu yerga o‘quvchi-talabalar, sohaga qiziqqan yoshlar uchun ekskursiyalar tashkillash ko‘zda tutilgan.
Izoh (0)