Xorazmda “Najot” nomli tashkilotni yuritadigan huquq himoyachisi Hayitboy Yoqubov 28-avgust kuni 65 yoshida vafot etdi.
“Amerika ovozi”ning yozishicha, u uzoq yillardan beri inson huquqlari uchun kurashib kelgan. Majburiy mehnat va korrupsiyaga qarshi mahalliy ravishda targ‘ibot olib borib, fermerlar va ishchilarni himoya qilgan.
“Gazeta.uz”ning qayd etishicha, O‘zbekistonda hokimiyat almashganidan so‘ng boshqa huquq himoyachilari bilan bir qatorda Haitboy Yoqubov davlat organlari va xalqaro tashkilotlar tomonidan o‘tkaziladigan turli loyiha va tadbirlarga taklif etila boshlandi. Ammo u 2020-yilda asos solgan “Najot” tashkiloti hali ham ro‘yxatdan o‘tkazilmagan. 2018-yilda u “Amerika ovozi”ga bergan intervyusida ro‘yxatdan o‘tkazish uchun 19 marta ariza berganini aytgan.
AQShning Toshkentdagi elchixonasi marhumning yaqinlari, do‘stlari va hamkasblariga chuqur hamdardlik bildirdi. Elchixona xabarida aytilishicha, Haitboy Yoqubov 29 yil inson huquqlari himoyachisi sifatida faoliyat yuritgan va O‘zbekistonda huquqbonlik faoliyatining paydo bo‘lishi bilan bevosita bog‘liq.
“U O‘zbekistonda fuqarolik jamiyati va inson huquqlari standartlarini shakllantirishga katta hissa qo‘shdi. Biz uning, ayniqsa, O‘zbekistonning shimoli-g‘arbiy qismida, lavozimini suiiste’mol qilish va fundamental huquqlar barcha ko‘rinishdagi buzilish holatlaridan aziyat chekkanlarni qo‘llab-quvvatlashga bo’lgan ulkan sadoqati va tayyorligidan ruhlanardik”, — deyiladi xabarda.
Mavzuga doir: Huquq himoyachisi Sur’at Ikromov 76 yoshida vafot etdi
Izoh (0)