2 сентябрь куни Тошкент вақти билан соат 07:30 да Ниагара шаршараси Ўзбекистон мустақиллигининг 30 йиллиги шарафига мамлакат байроғи рангларида ёритилди.
Аввалроқ АҚШ ва Канадада яшовчи ўзбекистонликлар ушбу тадбирни сайтдаги анкетани тўлдириб, тўғридан-тўғри томоша қилишлари мумкинлиги тўғрисида хабар берилганди. Ниагара шаршарасининг Ўзбекистон байроғи ранглари билан ёритилиши 15 дақиқа давом этган.
Таъкидлаш керакки, Ўзбекистон мустақиллигининг 30 йиллиги муносабати билан турли давлатлардаги дунёга машҳур биноларда ҳам мамлакат байроғи тасвирланди. Хусусан, Дубайдаги дунёдаги энг баланд бино Бурж-Халифа ва Пальманинг фавворалари Ўзбекистон байроғи ранглари билан ёритилди.
Атакўле телеминораси — Туркия пойтахти Анқаранинг энг узун нуқталаридан бири, шунингдек, пойтахтдаги эгизак бинолар ва Истанбулдаги афсонавий Фотиҳ Султон Меҳмет кўприги ҳам Ўзбекистон байроғининг рангларига бурканди.
Бундан ташқари, машҳур Петронас эгизак миноралари майдони, Куала-Лумпур мерияси биноси (Малайзиядаги энг катта LED-экран) ва Saloma Link пиёдалар кўприги Ўзбекистон байроғи рангларида ёритилди.
Нью-Йоркдаги Таймс-сквер экранида ҳам Ўзбекистон байроғини томоша қилиш мумкин бўлди.
Эслатиб ўтамиз, 2020 йилда Ўзбекистон мустақиллигининг 29 йиллиги муносабати билан Бирлашган Араб Амирликларининг Дубай шаҳрида жойлашган дунёнинг энг баланд иморат Бурж-Халифада Ўзбекистон байроғи 1 сентябрь куни 1 дақиқа давомида намойиш этилганди.
Изоҳ (0)