Dehqonobodda boquvchisini yo‘qotgan 42 nafar yetim bolaning xatna to‘yi o‘tkazib berildi

Dehqonobod tumanida 42 ta boquvchisini yo‘qotgan oila farzandlarining xatna to‘yi o‘tkazib berildi. Bu haqda “Daryo”ga tuman hokimligi axborot xizmati ma’lum qildi.

Ta’kidlanishicha, 31-avgust kuni shu munosabat bilan tumanda konsert dasturi tashkil etilgan.

“Prezidentimiz tashabbusi bilan ilgari surilayotgan saxovat va xayriya tadbirlari doirasida tumanda ro‘yxatga olingan boquvchisini yo‘qotgan oilalarning 42 nafar farzandining xatna to‘yi o‘tkazilib, ularga sovg‘a-salom ulashildi. Yaqinlari uchun bir piyola choy tashkil etilib, dildan suhbatlashish uchun imkoniyat yaratildi”, — deydi Dehqonobod hokimi Zoir Aliqulov.

Zoir Aliqulovning ma’lumot berishicha, tumanda bu kabi tadbirlar besh yildan beri o‘tkazib kelinmoqda.

“Har yili davlatimiz Mustaqilligi kunida, shuningdek, Navro‘z bayramida yetim, boquvchisini yo‘qotgan oilalar farzandlarining to‘yi o‘tkazib beriladi. Bu davlatimiz rahbari Shavkat Mirziyoyev tashabbusi bilan boshlangan tadbir bo‘lib, har bir tumanda o‘tkazilishi an’ana tusiga kirib qolgan”, — deydi tuman hokimi.

Qayd etilishicha, tumanda bayram munosabati bilan 10 ta maktab, 1 ta bog‘cha qayta qurilgan bo‘lsa, 54 ta maktab joriy ta’mirdan chiqqan. Shuningdek, ta’mirtalab bo‘lib qolgan 5 ta ko‘prik ta’mirlanib, foydalanishga topshirilgan.